Cənubi Afrikada dünyaca məşhur britaniyalı botaniklər Rod və Reyçel Sandersin qətli ilə bağlı dəhşətli cinayətin təfərrüatları üzə çıxıb.
Gündəm24.az xəbər verir ki,nadir bitkilər üzrə mütəxəssis olan və Silverhill Seeds şirkətinə rəhbərlik edən 74 yaşlı Rod Sanders və 63 yaşlı Reyçel Sanders 2018-ci ilin fevralında Kvazulu-Natal əyalətində ekspedisiya zamanı itkin düşüblər. Cütlük nadir bitkilər toplamaq üçün Nqoye meşəsində düşərgə qurmuşdu.
İstintaqın məlumatına əsasən, onlar silahlı cinayətkar dəstə tərəfindən qaçırılıb. Hücumçular cütlüyə bank kartlarının məlumatlarını əldə etmək məqsədilə işgəncə verib, daha sonra isə onları qətlə yetiriblər.
Araşdırma zamanı məlum olub ki, qurbanların cəsədləri yuxu torbalarına bükülərək Tugela çayına atılıb. Timsahların hücumuna məruz qalan qalıqların vəziyyəti o qədər ağır olub ki, şəxsiyyətləri yalnız DNT analizi və diş qeydləri vasitəsilə müəyyənləşdirilib.
Cinayətkarlar Reyçel Sandersin bank kartlarından istifadə edərək on minlərlə funt sterlinq xərcləyiblər. Məhz bu əməliyyatlar istintaqı onların izinə çıxarıb.
Polisin keçirdiyi əməliyyat zamanı şübhəlilərin yaşadığı yerlərdə qurbanlara məxsus telefonlar, noutbuklar, şəxsi əşyalar, düşərgə avadanlıqları və oğurlanmış avtomobil aşkarlanıb.
İş üzrə saxlanılan bütün şəxslər məhkəmə qarşısına çıxarılıb. Hökmün iyunun 19-da elan ediləcəyi gözlənilir. Cənubi Afrika qanunvericiliyinə əsasən, təqsirləndirilən şəxsləri ömürlük həbs cəzası gözləyir.//Ajans.az
