Moskvanın Domodedovo hava limanında Tel-Əvivdən gələn İsrail vətəndaşları Rusiya güc strukturları tərəfindən sərt rəftarla üzləşiblər. 19 aprel tarixində baş verən hadisə zamanı azı 40 nəfər saxlanılaraq sorğu-sual edilib.
Gündəm24.az KONKRET.az-a istinadən xəbər verir ki, saxlanılanlar arasında həm İsrail-Rusiya ikili vətəndaşlığı olan şəxslər, həm də yalnız İsrail pasportu daşıyanlar olub. Şahidlərin verdiyi məlumata görə, onlar təxminən beş saat ərzində susuz, qidasız və sanitar qovşaqdan istifadə imkanı olmadan saxlanılıblar. Güc strukturlarının əməkdaşları özlərini kobud apararaq sərnişinlərdən telefonlarının kilidini açmağı tələb ediblər. Rədd cavabı aldıqdan sonra isə texnikanı tamamilə söndürmək göstərişi verilib.
Sorğu-sual zamanı bəzi israillilər birbaşa İranla müharibədə ittiham olunublar. Güc strukturlarının təmsilçiləri “İran Rusiyanın müttəfiqidir”, “İranın düşməni bizim də düşmənimizdir” və “Sizin gəlişinizə şad deyilik” kimi ifadələr işlədiblər. Beş saatlıq gərginlikdən sonra saxlanılanlara xüsusi “xəbərdarlıq” sənədləri imzalatdırılaraq sərbəst buraxılıblar. Maraqlıdır ki, sənədlərin təqdim edilməsi anında güc strukturu əməkdaşlarının rəftarı qəfil dəyişərək “olduqca nəzakətli” formaya düşüb.
