Ukrayna Rusiyanın müxtəlif bölgələrinə gecə saatlarında pilotsuz uçuş aparatları (PUA) ilə hücum edib.
Gündəm24.az Modern.az-a istinadla xəbər verir ki, Tambov vilayətinin Kotovsk şəhərində yerləşən logistika mərkəzinə PUA zərbəsi endirilib. Vilayət qubernatoru Yevgeni Pervışovun məlumatına görə, hadisə zamanı gecə növbəsində çalışan 7 nəfər həlak olub.
İlkin məlumata əsasən, 25 nəfər müxtəlif dərəcəli xəsarətlər alıb. Onlardan 23-ü Kotovsk, Tambov və vilayət xəstəxanalarına yerləşdirilib. Yaralılardan birinin vəziyyəti son dərəcə ağır, 6 nəfərin vəziyyəti ağır, 16 nəfərin vəziyyəti isə orta ağır qiymətləndirilir. Əksər yaralanmaların qəlpə xəsarətləri olduğu qeyd edilir.
Hadisə yerinə təcili tibbi yardım briqadaları, FHN əməkdaşları, yanğınsöndürənlər və hüquq-mühafizə orqanlarının əməkdaşları cəlb olunub. Logistika mərkəzində baş verən yanğın söndürülsə də, ərazidə təhlükəsizlik tədbirləri davam etdirilir.
Eyni zamanda, Moskva vilayəti də PUA hücumlarına məruz qalıb. Vilayət qubernatoru Andrey Vorobyovun sözlərinə görə, hücumlar nəticəsində ümumilikdə 26 nəfər xəsarət alıb.
Yaralılardan 24 nəfəri Elektrostal şəhərindəki anbar kompleksində qeydə alınıb. Daha iki nəfər isə Noqinskdə yardım alıb. Burada PUA-nın düşməsi nəticəsində neft bazasında yanğın baş verib.
Hadisə ilə əlaqədar neft bazasının yaxınlığında yerləşən doğum evi təxliyə olunub. Pasiyentlər və tibb personalı digər xəstəxanalara köçürülüb. Xüsusi tibbi yardıma ehtiyacı olan qadınlar Noqinsk, Balaşixa və Şolkovo şəhərlərindəki tibb müəssisələrinə yerləşdirilib. Bundan əlavə, yaxınlıqdakı çoxmənzilli yaşayış binasının sakinləri də təxliyə edilib.
