Ermənistanda “Tramp marşrutu”nun (TRIPP) həyata keçirilməsi ölkədə Amerika özəl hərbi şirkətlərinin və kəşfiyyat infrastrukturunun meydana çıxmasına səbəb ola bilər.
Musavat.com-un məlumatına görə, bu barədə Rusiya Təhlükəsizlik Şurası katibinin müavini Aleksey Şevtsov bildirib.
Onun fikrincə, layihənin həyata keçirilməsində iştirak edəcək Amerika-Ermənistan şirkətinə marşrutun bütün uzunluğu boyunca təhlükəsizliyin təmin edilməsi funksiyalarının verilməsi nəzərdə tutulur.
Ermənistan tərəfi isə sərhəd və gömrük nəzarətini həyata keçirməkdə davam edəcək. “Əslində bu, Amerika özəl hərbi şirkətlərinin Ermənistan ərazisinə “daxil olması” və İrandan cəmi bir neçə yüz metr məsafədə yerləşən bu ölkədə Amerika kəşfiyyatının, hətta ola bilsin ki, digər infrastrukturun meydana çıxması anlamına gələ bilər”, – deyə Şevtsov iddia edib.
“İnterfaks” xəbər verir ki, onun sözlərini Rusiya Təhlükəsizlik Şurası Aparatının mətbuat xidməti yayıb.
Rusiya rəsmisi daha sonra bildirib ki, belə vəziyyət marşrutun özünün və onunla həyata keçiriləcək daşımaların təhlükəsizliyini sual altına qoya bilər.
Şevtsovun sözlərinə görə, TRIPP üzrə razılaşmanın həyata keçirilməsi ilə bağlı yaranacaq mübahisələr ABŞ və Nyu-York ştatının qanunvericiliyinə uyğun şəkildə həll ediləcək. Bundan başqa, podratçı şirkətə torpaqdan istifadə ilə bağlı müstəsna hüquqlar veriləcək.
“Bu isə amerikalıların onların nəzarətində olan marşrut hissəsindən keçən yükləri “filtrasiya” edə bilməsi deməkdir”, – deyə Rusiya Təhlükəsizlik Şurası katibinin müavini iddia edib.
Şevtsov narahatlığını ABŞ-nin hazırkı siyasəti və Hörmüz boğazı ətrafındakı fəaliyyəti ilə də əlaqələndirib. “Buna görə də razılaşmanın şərtlərini və ABŞ-nin hazırkı siyasətini, o cümlədən onların bu yaxınlarda Hörmüz boğazını “bağlamağa” yönəlmiş cəhdlərini nəzərə alsaq, gələcək nəqliyyat dəhlizinin etibarlılığı kifayət qədər şübhəli görünür”, – deyə o bildirib.
Açıqlamadan göründüyü kimi, Kreml Zəngəzur dəhlizində özünün varlığını təmin etmək üçün ən müxtəlif iddiaları n tirajlanmasına geniş meydan verib, hətta şantaj üsullarına da əl atılır. İddialar həm də İranı dəhlizin reallaşmasına müqavimət göstərməyə həvəsləndirmək niyyəti daşıyır. Ancaq bu da faktdır ki, Rusiya 2020-ci ilin 10 noyabr bəyanatındakı sonuncu bəndin, Zəngəzur dəhlizinin açılmasını nəzərdə tutan razılaşmanın reallaşmasına 5 il ərzində maraqlı olmadı, yalnız Vaşinqton razılaşnasından sonra həyəcanla bu mövzuya qayıtdı. İrəvanın sonuncu iddialara reaksiyası maraqlıdır…
