ABŞ və İran arasında aparılan diplomatik danışıqların nəticəsi olaraq tərəflər arasında ilkin razılaşmanın əldə olunduğu bildirilir. Məlumata görə, sazişin rəsmi imzalanma mərasiminin iyunun 19-da İsveçrədə keçirilməsi planlaşdırılır.
Gündəm24.az xəbər verir ki, İran xarici işlər nazirinin müavini Kazem Qəribabadi İran mediasına açıqlamasında ABŞ ilə anlaşma memorandumunun mətninin yekunlaşdırıldığını bildirib.
Onun sözlərinə görə, sazişin icrasının ilk mərhələsində ABŞ tərəfindən hərbi əməliyyatların dayandırılması, bəzi məhdudiyyətlərin aradan qaldırılması və tərəflərin üzərlərinə götürdükləri öhdəliklərin yerinə yetirilməsinin monitorinqi nəzərdə tutulur.
Qəribabadi qeyd edib ki, sazişin imzalanmasından sonra 60 gün ərzində sanksiyalar, nüvə proqramı, iqtisadi əməkdaşlıq və regional təhlükəsizlik məsələləri ilə bağlı əlavə danışıqlar davam etdiriləcək.
İran rəsmisinin sözlərinə görə, əldə olunan razılaşma təkcə ABŞ-İran münasibətlərini deyil, regiondakı digər prosesləri də təsirləndirə bilər. O bildirib ki, sənəd çərçivəsində bəzi regional münaqişələrin həlli və gərginliyin azaldılması istiqamətində addımların atılması da nəzərdə tutulur.
Qəribabadi onu da əlavə edib ki, razılaşma İranın əsas tələblərinin bir hissəsini özündə ehtiva edir və sənədin mətni imzalanma mərasimindən əvvəl ictimaiyyətə təqdim oluna bilər.
Tərəflərdən və digər beynəlxalq mənbələrdən mövzu ilə bağlı rəsmi açıqlamaların verilməsi gözlənilir.
