Rusiyanın tanınmış televiziya aparıcısı, jurnalist və musiqi tənqidçisi Sergey Sosedov 58 yaşında vəfat edib.
Gündəm24.az Musavat.com-a istinadən xəbər verir ki, Sosedovun ölümü sentyabrın 23-də Yakutiyanın Neryunqri şəhərində baş verib.
Onun vəfat etdiyini yaxınları TASS-a təsdiqləyiblər. İlkin məlumatlara görə, hadisə bədbəxt hadisə nəticəsində baş verib.
Məlumata görə, Sosedov Yakutiyaya sentyabrın 25-də keçiriləcək “Uzaq Şərqin İncisi” gözəllik və moda müsabiqəsində münsiflər heyətinin sədri kimi iştirak etmək üçün gedib. Hadisənin qaldığı hoteldə baş verdiyi bildirilir.
Rusiyanın bir sıra media orqanları və Sosedovun anasının açıqlamasına əsasən, televiziya aparıcısı pilləkənlərlə enərkən yıxılıb və başından ağır xəsarət alıb. O, xəstəxanaya çatdırılıb, lakin əməliyyat zamanı həyatını itirib.
Sosedovun ölüm xəbəri həmkarlarını da sarsıdıb. Televiziya aparıcısı Vadim Takmenev onun vəfatını təsdiqləyərək Sosedovu “Superstar!” layihəsinin ayrılmaz hissəsi kimi xatırlayıb və yeni mövsümün onun xatirəsinə həsr olunacağını bildirib.
Sergey Sosedov jurnalistika fəaliyyətinə 1980-ci illərin sonlarında başlayıb. O, müxtəlif illərdə “Akuly pera”, “X-Factor”, “Superstar!” və digər televiziya layihələrində iştirak edib. Xüsusilə musiqi tənqidçisi kimi tanınıb və televiziya layihələrində münsif kimi çıxış edib.
Onun ölümünün dəqiq tibbi səbəbi ilə bağlı yekun rəsmi nəticələr hələ açıqlanmayıb. Bəzi media mənbələrində müxtəlif ehtimallar səsləndirilsə də, yaxınları və TASS-a danışan mənbə hadisəni bədbəxt qəza kimi təqdim edib.
