Amerikalı musiqi prodüseri və bəstəkar Tay Keith kimi tanınan Braytavius Çambers 29 yaşında vəfat edib.
Ajans.az xarici mediaya istinadən xəbər verir ki, prodüser cümə axşamı günü yaşadığı mənzildə ölü tapılıb. Polis ilkin araşdırmalar zamanı ölüm hadisəsində zorakılıq və ya cinayət əlamətlərinin aşkarlanmadığını bildirib.
“Qremmi mükafatına namizəd göstərilmiş musiqi prodüseri Tay Keith kimi tanınan 29 yaşlı Braytavius Çambers mənzilində ölü tapılıb. Hazırda hadisədə qanun pozuntusuna dair hər hansı əlamət müəyyən edilməyib”, – deyə rəsmi açıqlamada qeyd olunub.
Bildirilib ki, ölümün dəqiq səbəbi məhkəmə-tibbi ekspertizanın və yarılma nəticələrinin ardından açıqlanacaq.
Tay Keith musiqi karyerasına yeniyetmə yaşlarında başlayıb. O, ilk işlərini YouTube və müxtəlif hip-hop platformalarında paylaşaraq tanınıb. Prodüser xüsusilə reperlər Travis Scott və Drake ilə əməkdaşlığı sayəsində dünya şöhrəti qazanıb.
Onun ən uğurlu layihələrindən biri Travis Scottun 2018-ci ildə yayımlanan və qlobal hitə çevrilən “Sicko Mode” mahnısı olub. Məhz bu işinə görə Tay Keith 2019-cu ildə Grammy mükafatına namizəd göstərilmişdi.
Billboard-un məlumatına görə, prodüserin iştirakı ilə hazırlanan mahnılardan 11-i Billboard Hot 100 siyahısında ilk onluğa daxil olub, dörd mahnı isə reytinq cədvəlinin zirvəsinə yüksəlib.
Tay Keith müasir hip-hop musiqisinin ən tanınmış prodüserlərindən biri hesab olunurdu və onun ölümü musiqi dünyasında böyük kədər yaradıb.
