İranın cənub bölgələrində iyulun 9-da baş verən silsilə hava zərbələri regionda yeni bir müəmmalı gərginlik dalğası yaradıb. Buşer, Sistan və Bəlucistan əyalətləri, eləcə də Əhvaz və Çabahar şəhərlərində güclü partlayışlar qeydə alınıb. Hadisənin kim tərəfindən törədildiyi hələ də məlum deyil və heç bir dövlət hücumlara görə məsuliyyəti üzərinə götürməyib.
NOCOMMENT.az xəbər verir ki, hadisədən qısa müddət əvvəl – yerli vaxtla səhər saat 06:30 radələrində ABŞ Silahlı Qüvvələrinin Mərkəzi Komandanlığı (CENTCOM) təxminən 90 hədəfə qarşı uğurlu hava əməliyyatları keçirdiyini elan etmişdi. Lakin əməliyyatla bağlı məlumatlı olan ABŞ rəsmisi, rəsmi bəyanatdan sonra Amerika tərəfinin yeni bir zərbə endirmədiyini bildirib. İsrail tərəfi də hadisədə iştirakını təkzib edib. Qeyd olunur ki, İsrail iyun ayından bəri İrana qarşı heç bir hava əməliyyatı keçirməyib və adətən öz hərbi əməliyyatlarını dərhal etiraf edir.
Tehran rəsmi olaraq heç bir dövləti birbaşa ittiham etməsə də, İran parlamentinin Milli Təhlükəsizlik Komitəsinin üzvü, İslam İnqilabı Keşikçiləri Korpusunun (SEPAH) keçmiş komandiri İsmayıl Kusari Birləşmiş Ərəb Əmirliklərini (BƏƏ) hədəf alıb. Deputat BƏƏ-ni ABŞ-ın son zərbələrində “pərdəarxası” rol oynamaqda günahlandıraraq, rəsmi Əbu-Dabinin bu əməkdaşlığa görə “ağır bədəl ödəyəcəyi” ilə bağlı hədələr səsləndirib.
