Məlumat verdiyimiz kimi, Azərbaycanda dövlət ümumi təhsil müəssisələrində şagirdlərin geyim forması ilə bağlı yeni qaydalar müəyyənləşdirilib.
Mövzu ilə bağlı Redaktor.az-a danışan təhsil eksperti Ramin Nurəliyev qeyd etdi ki, orta ümumtəhsil məktəblərində hər bir şagird məktəb nizam-intizam qaydalarına uyğun olaraq tədris prosesinə cəlb olunmalıdır:
“Məktəb nizam-intizam qaydalarında da, əlbəttə ki, Nazirlər Kabinetinin müvafiq qərarı əsas rol oynayır. Məhz bu istiqamətdə, düşünürəm ki, həm valideynlər, həmçinin də məktəb rəhbərliyi bu qərara xüsusilə diqqət və nəzarət etməlidirlər. Vahid geyim formasından kənara çıxılmaması istiqamətində lazımi tədbirlər görülməlidir. Nə üçün belə bir qərara ehtiyac var? Biz beynəlxalq təcrübəyə baxdığımız təqdirdə dünyanın inkişaf etmiş, təhsili yüksək səviyyədə olan ölkələrində – Avropada, Amerikada, Kanadada, Çində, ümumiyyətlə, elə qardaş Türkiyənin özündə görürük ki, şagirdlər orta ümumtəhsil məktəblərində vahid geyim formasında tədris prosesinə cəlb olunurlar. Bununla bağlı hər hansı bir güzəşt, əlbəttə ki, məktəbin pedaqoji şurası tərəfindən verilir. Misal üçün, hər hansı bir məktəbin tədbirlərində milli geyim formasında çıxış edilməsi, musiqi dərsləri və sair kimi hallarda, əlbəttə ki, məktəbin pedaqoji şurası müvafiq qərar verir və həmin qərara uyğun olaraq da şagirdlərin fərqli geyim formasında tədris prosesinə cəlb olunmasına icazə verilir”.
Həmsöhbətimizin sözlərinə görə, orta ümumtəhsil məktəblərində vahid geyim forması həm məktəb nizam-intizam qaydalarının yüksək səviyyədə təmin olunmasına, həmçinin sosial bərabərliyin təmin olunmasına müəyyən qədər töhfə vermiş olacaq:
“Çünki şagirdlər arasında birinin maddi imkanı var, birinin yoxdur, birinin geyinmək imkanı var, birinin yoxdur şəklində məsələlər artıq sona çatacaq. Çünki vahid geyim forması artıq maddi imkandan irəli gələn müəyyən fərqlərə qətiyyən yol vermir və bu istiqamətdə sosial bərabərliyin də təmin olunmasında, əlbəttə ki, müvafiq qərarın nə qədər əhəmiyyətli olduğu açıq-aydın görünür. Yəni qərar həm məktəbdə nizam-intizam qaydalarının formalaşmasında, həmçinin sosial bərabərliyin təmin olunmasında xüsusi rol oynayacaq. Orta ümumtəhsil məktəblərində müvafiq qaydada müəyyən edilmiş məktəbli geyim formasından kənara çıxılması sadəcə məktəb Pedaqoji Şurasının qərarına əsasən həyata keçirilmiş olacaq. Yəni bu məsələyə xüsusi diqqət yetirilməlidir və bu istiqamətdə həm valideynlər, həm müəllimlər, həmçinin şagirdlərin özləri verilən qərara xüsusi diqqət yetirməli və qərara uyğun olaraq addım atmağa çalışmalıdırlar”.
