İran mediasında İsrailin Baş naziri Binyamin Netanyahunun sui-qəsd nəticəsində öldürüldüyü barədə iddialar yayılıb. Məlumatlarda onun bir neçə gündür ictimaiyyət qarşısına çıxmaması və yaşayış yerinin ətrafında təhlükəsizlik tədbirlərinin gücləndirilməsinin bu iddialara səbəb olduğu bildirilib.
Gündəm24.az xəbər verir ki, həmçinin ABŞ-ın Yaxın Şərq üzrə elçisi Steve Witkoff və Jared Kushnerin İsrailə planlaşdırılan səfərlərinin ləğv edilməsi də müxtəlif ehtimalların irəli sürülməsinə səbəb olub. İran mediası bununla yanaşı İsrailin milli təhlükəsizlik naziri Itamar Ben-Gvir və baş nazirin qardaşı Iddo Netanyahunun hücumlarda öldürüldüyünü, lakin bu məlumatın gizlədildiyini iddia edib.
Lakin yayılan xəbərlərdən bir neçə saat sonra Binyamin Netanyahu ictimaiyyət qarşısına çıxaraq Milli Səhiyyə Təcili Yardım Əməliyyatları Mərkəzini ziyarət edib.
Baş nazir burada çıxış edərək bu sözləri deyib:
“Məqsədimiz İran xalqının zülm boyunduruğundan azad olmasına imkan yaratmaqdır. Nəticədə bu, onların öz seçimidir. Lakin indiyədək atdığımız addımlarla Tehran rejiminə ciddi zərbə vurmuşuq”.
