ABŞ-nin müdafiə naziri Pit Heqset bildirib ki, bu gün İrana qarşı müharibə başlayandan bəri ən intensiv hava hücumları həyata keçiriləcək.
Sfera.az xəbər verir ki, o, bu barədə ABŞ Baş Qərargah rəisi Dan Kaine ilə birlikdə keçirdiyi mətbuat konfransında danışıb. Nazirin sözlərinə görə, ABŞ və İsrailin İrana qarşı həyata keçirdiyi hərbi əməliyyatlar artıq bir həftədir davam edir. Bu müddətdə ABŞ və İsrail İran ərazisində bir sıra hərbi hədəflərə zərbələr endirib. İran isə cavab olaraq İsraili və regionda yerləşən ABŞ hərbi bazalarını hədəfə alır.
Pit Heqset çıxışında İran hakimiyyətini sərt tənqid edərək bildirib ki, İran rejimi 47 ildir ABŞ hərbçilərini hədəfə alır:
“Bu mübarizə bizi dərindən təsirləndirir. Bizim nəsil bu mübarizəni yaxşı anlayır. 47 ildir İran rejimi silahdaşlarımızı öldürür”, – deyə o qeyd edib. Nazir əlavə edib ki, bu gün İrana qarşı genişmiqyaslı hava əməliyyatı planlaşdırılır. Onun sözlərinə görə, əməliyyat çərçivəsində indiyədək ən çox döyüş və bombardman təyyarəsi istifadə olunacaq və hücumların sayı da rekord səviyyədə olacaq. Pit Heqset bildirib ki, ABŞ kəşfiyyatı hazırda əvvəlkindən daha inkişaf etmiş vəziyyətdədir və zərbələr dəqiq hədəflərə endirilir.
ABŞ müdafiə naziri qeyd edib ki, indiyədək İranda təxminən 5 min hədəf bombalanıb, 50-dən çox İran hərbi gəmisi məhv edilib. O həmçinin bildirib ki, ABŞ-nin məqsədlərindən biri İranın raket istehsal imkanlarını və hərbi dəniz qüvvələrini zəiflətməkdir.
