Son günlər uşaq pulu ilə bağlı səsləndirdiyi fikirlərlə geniş müzakirələrə səbəb olan tanınmış aparıcı Səidə Bəkirqızı yenidən gündəmdədir. Onun Azərbaycan kişilərinin uşaq pulu tələb etməsinə dair açıqlamaları sosial şəbəkələrdə birmənalı qarşılanmayıb. Bir çox istifadəçi tərəfindən sərt tənqid hədəfinə çevrilib. Aparıcı isə fikirlərinin kontekstdən çıxarıldığını və haqqında məqsədli qarayaxma kampaniyasının aparıldığını bildirir.
Mövzu ilə bağlı yaranan suallara aydınlıq gətirmək üçün KONKRET.az Səidə Bəkirqızı ilə həmsöhbət olub.
– Səidə xanım, son günlər sosial şəbəkələrdə haqqınızda tənqidi fikirlərin sayı artıb. Bu, uşaq pulu ilə bağlı çıxışlarınızdan sonra başladı. Bu reaksiyaları necə qiymətləndirirsiniz?
– Əvvəlcə onu deyim ki, mən cəmiyyətin yaddaşında qıcıq yaradan aparıcı kimi qalmamışam. Əksinə, bir çox problemlərə işıq salan, insanların cürət edib deyə bilmədiklərini səsləndirən aparıcı kimi tanınmışam. Mənim haqqımda formalaşdırılan mənfi rəyin əsas səbəbi montaj olunmuş videolardır.
Təəssüf edirəm ki, bəzi həmkarlarımız belə həmin videolara əsaslanaraq materiallar hazırlayırlar. Əgər ali təhsilli jurnalistlər mənim fikirlərimin təhrif olunmuş versiyasına inanırlarsa, o zaman sıravi izləyiciləri qınamaq düzgün olmaz. Bununla belə, kifayət qədər ağıllı və diqqətli tamaşaçılarım var. Onlar da bu gün mənə yazaraq bildirirlər ki, fikirlərim düzgün anlaşılmayıb.
– Bu cür açıqlamalar verməklə cəmiyyətdə qütbləşmə yaratdığınızın fərqindəsinizmi?
– Mən cəmiyyətin müəyyən məsələləri emosional şəkildə qəbul etdiyinin fərqindəyəm. Amma mən tamamilə başqa bir fikir səsləndirmişəm. Əgər cəmiyyət həmin fikirdən fərqli bir mövzu ətrafında mübarizə aparırsa, bu, mənim deyil, həmin yanaşmanın problemidir.
Mən nə dediyimi bilən adamam və dediyim sözlərin arxasında dayanmağı bacarıram. Çünki həmin sözlərə inanıram. Mən Azərbaycan kişisini uşaq pulu üçün müraciət edən vəziyyətdə görmək istəmirəm. Tarix boyu, eləcə də 44 günlük Vətən müharibəsində Azərbaycan kişisini cəsur, döyüşkən və qürurlu görmüşük. Bu gün onun 30-40 manata möhtac vəziyyətə düşməsi bir qadın kimi məni üzür.
Mən demişdim ki, Azərbaycan kişisinə uşaq pulu istəmək yaraşmır. Biz iş yerlərinin açılmasını tələb etməliyik ki, insanlar sosial yardımlardan asılı qalmasınlar. Çünki sabah hər uşağa veriləcək 30-40 manat ailələrin problemlərini kökündən həll etmir. Mənim fikirlərim kontekstdən çıxarılıb və təəssüf ki, bir çox insan da məhz həmin təhrif olunmuş versiya üzərindən müzakirə aparır.
– Bəlkə Səidə Bəkirqızı bir qədər fasilə verib sosial problemlərin həllinə həsr olunan verilişlərə daha çox yer ayırsın? Sizcə, bu daha doğru olmazmı?
– Jurnalist fasilə verirsə, bu, müəyyən mənada məğlubiyyəti qəbul etmək deməkdir. Mən isə əksinə, bu reaksiyalardan daha da güclənirəm. Əgər cəmiyyət montaj olunmuş bir çıxışım ətrafında bu qədər müzakirə aparırsa, deməli, fikirlərimin çəkisi var.
Səidə Bəkirqızı illərdir ən çox sosial problemlərdən danışan, müxtəlif dövlət qurumlarının fəaliyyətini tənqid edən aparıcılardan biridir. Təəssüf ki, bütün bunlar bir kənara qoyulub və insanlar yalnız təhrif olunmuş bir fikrin arxasınca gedirlər. Məni daha çox üzən isə odur ki, bu prosesdə bəzi həmkarlarım da iştirak edir. Bu gün işıqlandırdığım bir çox mövzuları başqaları gündəmə gətirməyə cəsarət etməyib. Bunu tam səmimiyyətimlə deyirəm.
– Uşaq pulu istəyən kişilərlə bağlı mövqeyinizi dəyişə bilərsinizmi? Çünki valideynlər dövlətin sosial proqramlarından yararlanmaq istəyirlər. Bəzi tənqidçilər isə sizin yanaşmanızın gender bərabərliyinə zidd olduğunu düşünür.
– Uşaqlı ailələr bu gün də müxtəlif dövlət sosial proqramlarından yararlanırlar. Qəyyumluğa verilən uşaqlara da müəyyən ödənişlər edilir. Elə bu gün – 1 İyun Uşaqların Beynəlxalq Müdafiəsi Günündə də aidiyyəti qurumlar bununla bağlı məlumat açıqladılar və sosial təminat alan ailələrin statistikası təqdim olundu.
Mənim uşaq puluna qarşı aqressiyam yoxdur. Sadəcə bəzi şəxslər fikirlərimi təhrif edərək guya mənim “uşaq pulu istəyənlər kişi deyil” və ya daha ağır ifadələr işlətdiyimi iddia edirlər. Bu, tamamilə yalandır. Mən belə söz deməmişəm, bu gün də demirəm, sabah da deməyəcəyəm.
Mən yalnız onu demişəm ki, Azərbaycan kişisini uşaq pulu istəyən vəziyyətdə görmək istəmirəm. Mənə görə insanlar işləməli, əziyyət çəkməli və sosial yardımlardan asılı olmamalıdırlar. Dövlət belə bir qərar versə, əlbəttə ki, həyata keçiriləcək. Amma olmayan bir şeyin hər gün tələb edilməsinin nə qədər məntiqli olduğunu da düşünmək lazımdır.
Mənə ən çox yazanların böyük əksəriyyəti kişilərdir və tez-tez uşaq pulu ilə bağlı suallar verirlər. Hər dəfə də izah edirəm ki, bu məsələ yalnız dövlət başçısının qərarı ilə həll oluna bilər. Mənim Azərbaycan kişiləri ilə heç bir problemim yoxdur. Əksinə, onların daha güclü, daha təminatlı olmalarını istəyirəm.
Kimlərsə çıxışımın müəyyən hissələrini kəsərək mənə qarşı mənfi rəy formalaşdırmağa çalışıblar. Müəyyən qədər buna nail də olublar. Amma mən dediyim sözə əmin olduğum üçün hesab edirəm ki, bu kampaniyanın da ömrü uzun olmayacaq. Fakt ortaya qoysunlar ki, mən onların iddia etdiyi sözləri demişəm. Əks halda, bu cür manipulyativ başlıqlar hazırlayanlar öz peşəkar məsuliyyətləri barədə düşünməlidirlər.
