Bakının Sabunçu rayonunda yerləşən 271 nömrəli tam orta məktəbdə şagirdlər arasında fiziki zorakılıq hallarının yaşandığı iddia edilir. Sosial şəbəkələrdə və valideynlər arasında yayılan məlumatlara görə, təhsil müəssisəsinin N.A. adlı şagirdi digər məktəblilərə qarşı mütəmadi olaraq aqressiv davranışlar nümayiş etdirir.
Gündəm24.az xəbər verir ki, sözügedən şagirdin demək olar ki, hər gün digər həmyaşıdlarına fiziki şiddət göstərdiyi bildirilir. Bu vəziyyət həm şagirdlər, həm də valideynlər arasında ciddi narahatlığa və qorxuya səbəb olub. Məsələnin ictimailəşməsindən sonra aidiyyəti dövlət qurumlarına rəsmi sorğu ünvanlanıb və hadisənin təfərrüatlarının araşdırılması tələb olunub.
Xatırladaq ki, bu, 271 nömrəli məktəbdə baş verən ilk bənzər hadisə deyil. Ötən ilin fevral ayında da həmin təhsil müəssisəsində şagirdlər arasında yaşanan dava görüntüləri sosial şəbəkələrdə geniş müzakirə olunmuşdu. Təhsil ocağında zorakılıq hallarının təkrarlanması məktəbdəki nizam-intizam və uşaqların təhlükəsizliyi məsələsini yenidən gündəmə gətirib. Hazırda hüquq-mühafizə orqanları və təhsil idarəsinin məsələyə reaksiyası gözlənilir./NOCOMMENT.az
