Qusar rayonunda ata və oğul arasında yaşanan mübahisə cinayətlə nəticələnib.
Gundem24.az Demokrat.az-a istinadən xəbər verir ki, hadisə onların birgə yaşadıqları evdə baş verib. Məlumata görə, tərəflər arasında yaranan mübahisə qısa zamanda gərginliyə çevrilib. Hadisənin detalları araşdırılır.
Qusar rayon sakini, 1998-ci il təvəllüdlü Mehdi ailə münaqişəsi zəminində yaranan mübahisə zamanı atası Eldara (adlar şərtidir – red.) xəsarət yetirib.
Hadisəni törədən Mehdinin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Mehdi ona elan olunmuş ittiham üzrə özünü təqsirli bilib.
O bildirib ki, hadisə günü saat 16 radələrində atası Eldar ilə birgə yaşadığı evdə aralarında yaranmış mübahisə zamanı yumruq və kəllə zərbələri ilə onun sifət nahiyəsinə vurub.
O, hazırda törətdiyi əməldən səmimi peşmançılıq hissi keçirdiyini, zərərçəkmiş şəxslə barışdığını, atasının ona qarşı heç bir şikayətinin olmadığını deyib.
Bu işə Qusar Rayon Məhkəməsində baxılıb. Məhkəmədə məlum olub ki, təqsirləndirilən şəxs zərərçəkənlə barışıq əldə edib. Bu səbəbdən zərərçəkmiş ona qarşı şikayətini geri götürüb.
Məhkəmənin hökmü ilə Cinayət Məcəllənin 73.2-ci maddəsinə əsasən təqsirləndirilən şəxsin barəsində olan cinayət təqibinə xitam verilib.
O, cinayət məsuliyyətindən azad edilib.
