İran Xarici İşlər Nazirliyi ABŞ-nin ölkənin cənub sahillərində yerləşən obyektlərə endirdiyi hava zərbələrini pisləyən rəsmi bəyanat yayıb.
Gündəm24.az xəbər verir ki, nazirlik Vaşinqtonun hərəkətlərinin həm BMT Nizamnaməsi, həm də iyunun 18-də hərbi əməliyyatların dayandırılması məqsədilə imzalanmış qarşılıqlı anlaşma memorandumuna zidd olduğunu qeyd edib.
“İranın sahil müşahidə obyektlərinə endirilən zərbələr BMT Nizamnaməsinin 2-ci maddəsinin 4-cü bəndi, eləcə də müharibənin dayandırılması haqqında qarşılıqlı anlaşma memorandumunun birinci bəndini açıq şəkildə pozur”, – bəyanatda bildirilib.
Eyni zamanda İran İsraili də Livana hücum etməkdə ittiham edib. Tehran bu hücumun ABŞ ilə koordinasiyalı şəkildə həyata keçirildiyini və əldə olunmuş razılaşmaların şərtlərini pozduğunu iddia edib.
İran Xarici İşlər Nazirliyi həmçinin Fars körfəzinin cənub sahillərində yerləşən ölkələrə müraciət edərək, onları mehriban qonşuluq prinsipinə əməl etməyə və öz ərazilərinin İrana qarşı zərbələr üçün istifadə edilməsinə imkan verməməyə çağırıb.
