Sosial şəbəkədə qeyri-etik hərəkətlər edən tiktoker saxlanılıb.
Gündəm24.az Modern.az-a istinadla xəbər verir ki, 47 yaşlı Zakir Musayev (şərti ad) “TikTok” sosial şəbəkəsində özünə məxsus səhifədə canlı yayım açıb. Bu zaman o, nalayiq ifadələr işlədib və bununla da ictimai mənəviyyatı təhqir edən əməllərə yol verib.
Fakt əsasında Z.Musayev polis əməkdaşları tərəfindən saxlanılıb və barəsində İnzibati Xətalar Məcəlləsinin 510.2-ci (internet informasiya ehtiyatında və ya informasiya-telekommunikasiya şəbəkəsində kütləvi nümayiş etdirildiyi halda ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlərin edilməsinə, yəni əxlaqsız ifadələrin səsləndirilməsinə və ya belə məzmun təəssüratı yaradan jestlərin edilməsinə, yaxud insan bədəninin hissələrinin əxlaq normalarına və milli-mənəvi dəyərlərə zidd formada göstərilməsinə görə) maddəsi ilə protokol tərtib olunub.
Z.Musayev ifadəsində bildirib ki, ilk dəfədir canlı yayım açır. Canlı yayım açmaqda məqsədi Rusiyada yaşayan əsgər yoldaşları ilə söhbətləşmək olub. Onun sözlərinə görə, izləyicilərdən biri övladını təhqir etdiyi üçün o da nalayiq ifadə işlədib. Z.Musayev əməlindən peşman olduğunu deyərək məhkəmədən ədalətli qərar qəbul edilməsini istəyib.
Məhkəmənin qərarı ilə Zakir Musayev inzibati qaydada 500 manat məbləğində cərimələnib.
