Bu gündən etibarən Azərbaycanda ödəniş sistemlərinin iştirakçıları arasında tətbiq edilən interçeync (xidmət haqqı tarifləri) ilə bağlı yeni qərar qüvvəyə minib.
Gündəm24.az xəbər verir ki, martın 18-də imzalanan qərara əsasən, ölkə daxilində ödəniş kartları ilə aparılan əməliyyatlarda müəyyən fəaliyyət sahələri (MCC kodlar) üzrə interçeyncin yuxarı həddi rəsmən məhdudlaşdırılıb.
Yeni qaydalara görə, tətbiq edilən maksimum tariflər aşağıdakı kimi müəyyən olunub:
Aptek, baqqal və supermarketlərdə (“Drug Stores and Pharmacies”, “Grocery Stores and Supermarket”) aparılan ödənişlərdə – məbləğin 1.25 faizi;
Yanacaqdoldurma məntəqələrində (“Petrol”) aparılan ödənişlərdə – məbləğin 0.75 faizi;
Ümumi kateqoriyaya (“General”) aid sahələrdə aparılan ödənişlərdə – məbləğin 1.5 faizi.
Qərarda nəzərdə tutulmayan digər fəaliyyət sahələri üzrə isə interçeyncin yuxarı həddi müəyyən edilmir.
İnterçeync nağdsız ödənişlər zamanı kartı verən bankla ödənişi qəbul edən bank arasında tətbiq olunan komissiya haqqıdır. Bu vəsait adətən satıcının banka ödədiyi xidmət haqqından bölünür və müştərilərə verilən keşbek (loyallıq) proqramlarının maliyyələşdirilməsinə yönəldilir. Yeni qərarla bankların bu sahədəki gəlirlərinin yuxarı həddi tənzimlənəcək.
Yəni, bu gündən etibarən market, aptek və yanacaqdoldurma məntəqələrində kartla ödəniş edərkən bankların bir-birindən tutduğu xidmət haqqı azaldılıb və bununla da sahibkarların banklara ödəyəcəyi komissiya xərcləri aşağı düşüb.
