Fransa prezidenti Emmanuel Makron bildirib ki, Vaşinqtonda sülh danışıqlarından sonra Ukrayna üçün təhlükəsizlik zəmanətlərinin razılaşdırılması üçün qarşıdakı iki həftə həlledici olacaq.

Gündəm24.az xəbər verir ki, Fransa lideri bu barədə LCI telekanalına müsahibəsində bildirib.

“Növbəti 15 gün amerikalılarla işi başa çatdırmaq və bu təhlükəsizlik zəmanətlərinə məzmun vermək üçün vacibdir
", - deyə Makron qeyd edib.

O vurğulayıb ki, Ağ Evdəki görüşlərdən və Donald Trampla Vladimir Putinin Alyaskadakı danışıqlarından sonra müttəfiqlər yeni təhlükəsizlik formatları üzərində işləməyə hazırdırlar.

“Son günlərdə baş verən böyük dəyişiklik prezident Trampın Ukraynanın təhlükəsizliyinə zəmanət verilməsinin zəruriliyini dərk etməsidir", - deyə Fransa prezidenti əlavə edib.

Makronun sözlərinə görə, tərəfdaş ölkələr, o cümlədən Fransa, Böyük Britaniya, Almaniya və Türkiyə cəbhə xəttində deyil, havada, dənizdə və quruda sakitləşdirici əməliyyatlar keçirməyə hazırdır.

Eyni zamanda o, Kremlin mövqeyi ilə bağlı həddindən artıq tələskənliyə və illüziyalara qarşı xəbərdarlıq edib. Makron vurğulayıb ki, gələcək saziş Ukraynanın ərazi bütövlüyünü bərpa etməsini və yeni təcavüzə qarşı cilovlanmasını təmin etməlidir.

Mövlam RZALI,
Gündəm24.az

Oxunub: 5