Son zamanlar müxtəlif ticarət şəbəkələri ilə bağlı istehlakçı şikayətlərinin sayı artmaqdadır. Xüsusilə gündəlik ərzaq məhsullarının satışında qiymət fərqlərinin yaradılması və alıcıların çaşdırılması ilə bağlı iddialar geniş müzakirə olunur.

GUNDEM24.az xəbər verir ki, bu dəfə şikayətçi jurnalist Elmir Muradovdur. O, OBA marketdə başına gələnləri bölüşüb.

Jurnalist bildirib ki, Nizami rayonu, Bəhruz Nuriyev küçəsində, “Siyaqut” şadlıq sarayının yanında yerləşən “Oba Market”də alıcıların hüquqları kobud şəkildə pozulur:

“Elə bilirlər ki, camaat heç nə görmür. Dəfələrlə etiraz etmişəm, hətta ictimailəşdirəcəyimi də demişəm. Amma yenə də özbaşınalıqlar davam edir. Bu dəfə də çörəyin qiymətində fırıldaq gəlməklə ciblərini doldururlar. Piştaxtada 65 və 55 qəpiklik çörək qoyurlar, ikisini də qatırlar bir-birinə. 55 qəpiklik götürəndə bilərəkdən kassada səndən 65 və ya 75 qəpik çıxırlar. İnsanların çoxu isə bunun fərqinə varmır. Elə bilirlər ki, götürdükləri çörək elə o qiymətədir”.

Elmir Muradov qeyd edib ki, bu cür hallarla “Oba” marketlərdə tez-tez rastlaşmaq mümkündür:

“Onlar konkret istehlakçıları aldatmaqla məşğuldurlar. Əslində bu, alıcılıq hüquqlarının kobud şəkildə pozulmasıdır. Qida məhsullarının qiymətində belə saxtakarlıqlar insanları narazı salır. Market rəhbərliyi isə şikayətlərə məhəl qoymur. Ona görə də vətəndaşlar alış-veriş edərkən xüsusilə diqqətli olmalıdırlar”.

Əli Səfərli,
GUNDEM24.az

Oxunub: 270