Avropa liderləri Ukrayna və Rusiya arasında potensial sülh sazişinin bir hissəsi kimi 40 kilometrlik bufer zonanın yaradılmasını müzakirə edirlər.

Gündəm24.az xəbər verir ki, bu barədə “Politico” beş avropalı diplomata istinadən məlumat yayıb.

Məlumatda bildirilir ki, bu təklif müharibədən sonrakı nizamlanma və ya barışıq üçün gündəmə gətirilən variantlardan biridir.

Lakin zonanın dərinliyi barədə yekdil qərar yoxdur. Bundan başqa, Kiyevin bu plana razı olub-olmayacağı da bəlli deyil, çünki bu, ərazi güzəştlərini nəzərdə tutur.

Diplomatların sözlərinə görə, ABŞ hələlik danışıqlarda iştirak etmir.

Nəşr yazır ki, avropalıların bu ideyanı gündəmə gətirməsi NATO müttəfiqlərinin çarəsizliyini göstərir. Pentaqonun keçmiş yüksək rütbəli rəsmisi Cim Taunsend isə deyib:

“Onlar saman çöpündən yapışırlar. Ruslar avropalılardan qorxmurlar. Əgər düşünürlərsə ki, bir neçə britaniyalı və fransız müşahidəçi Rusiyanın müdaxiləsinin qarşısını alacaq, yanılırlar”.

“Politico” qeyd edir ki, müzakirə olunan bufer zona texniki baxımdan Şimali və Cənubi Koreya arasındakı sərhədlə müqayisə olunmur.

Avropalı diplomatlar bunu daha çox Soyuq Müharibə dövründə Almaniyanın bölünməsi ilə əlaqələndirirlər.

Zona üzərində nəzarət edəcək sülhməramlı qüvvələrin sayına dair rəqəmlər 4 mindən 60 minədək dəyişir. Lakin hələlik heç bir ölkə konkret öhdəlik götürməyib. ABŞ prezidenti Donald Tramp isə Amerika hərbçilərinin bu prosesdə iştirakını qəti şəkildə istisna edib.

Diplomatların sözlərinə görə, NATO hazırda alyansın şərq cinahını qorumaq üçün 300 minlik cavab qüvvəsi hazırlayır. Buna görə də hər hansı sülhməramlı qüvvənin ikili funksiyası olacaq: Ukrayna hərbçilərinə təlim keçmək və demilitarizasiya zonasının yaxınlığında patrul xidməti aparmaq.

Fransa və Britaniya kontingentin əsas hissəsini formalaşdıra bilər. İki avropalı rəsmiyə görə, London və Paris digər müttəfiqləri də hərbi dəstək verməyə çağırır. Lakin Polşa və Almaniya belə bir addıma qarşı çıxıb. Onların fikrincə, qoşun göndərilməsi bu ölkələri Rusiyanın birbaşa hədəfinə çevirə bilər.

Xatırladaq ki, bufer zona münaqişə tərəflərini bir-birindən ayırmaq və toqquşma riskini minimuma endirmək məqsədilə yaradılan ərazidir.

Beynəlxalq münasibətlərdə daha çox hərbi-siyasi məqsədlərlə tətbiq olunur.

Mövlam RZALI,
Gündəm24.az

Oxunub: 7