Donald Trampın Vladimir Putinlə görüşü ərəfəsində ABŞ-da aparılan yeni sorğu nəticələri onun daxildə hansı ictimai ab-hava fonunda işlədiyini göstərir. ABŞ prezidenti üçün bu görüşdə səs-küyə səbəb olacaq uğur əldə etmək həyati əhəmiyyət daşıyır.

Gündəm24.az xəbər verir ki, “Pew Research” sorğu şirkətinin son araşdırmasına əsasən, respondentlərin 60%-i hazırda Ağ Evin sahibinin fəaliyyətini təsdiqləmir, yalnız 38%-i isə onu dəstəkləyir. Respublikaçılar istisna olmaqla, bütün demoqrafik qruplarda Trampın fəaliyyətinə mənfi yanaşma üstünlük təşkil edir. Ona 52% ağdərili, 66% Asiya mənşəli amerikalı, 70% latın, 83% isə afroamerikalı etibar etmir. 50 yaşdan aşağı olan amerikalılar arasında prezidentə müsbət baxış cəmi 33%-dir.

Trampı dəstəkləyən seçicilər arasında da rəqəmlər geriləyib – ümumi dəstək 95%-dən 85%-ə düşüb. 2024-cü ildə onu dəstəkləyən gənclər arasında isə bu göstərici 92%-dən 69%-ə enib.

Sorğuya görə, amerikalıların əksəriyyəti Trampa nə iqtisadiyyat, nə də xarici siyasət daxil olmaqla 12 əsas istiqamətin heç birində etibar etmir. Yalnız 43% onun vədlərini yerinə yetirdiyini düşünür, 37% “adi insanlara qayğı göstərir” deyir, “yaxşı nümunə” hesab edənlər isə 29%-ə qədər azalıb. Prezidentin “ağıllı və güclü” olduğunu düşünənlərin payı da 10% azalaraq 48%-ə düşüb.

Dövlət idarəçiliyinin yaxşılaşacağına inam da kəskin azalıb: 53% federal hökumətin daha pis işlədiyini, cəmi 27% isə əksini düşünür. Fevral ayında bu göstəricilər müvafiq olaraq 42% və 41% idi. Trampın siyasətinin bütün və ya əksər mövqelərini dəstəkləyənlər fevralda 35% idisə, indi bu rəqəm 29%-dir. Respublikaçılar arasında isə dəstək 67%-dən 58%-ə düşüb.

ABŞ prezidentinin ikinci müddətində yeddi ay tamam olmaq üzrədir. Lakin onun nailiyyətləri, özünün iddialarına baxmayaraq, ictimai rəydə “görkəmli” hesab olunmur. Qarşıdakı görüş Trampa güclü və qətiyyətli lider obrazını nümayiş etdirmək, həmçinin Vladimir Putinlə münasibətləri barədə səslənən tənqidlərə cavab vermək imkanı yaradacaq.

Səmra İsmayıl
Gündəm24.az

Oxunub: 12