Bakıda ictimai nəqliyyatda avtobusların sayı artırılsa da, sərnişinlərin dayanacaqlarda uzun müddət gözləməsi problemi hələ də aradan qalxmayıb. Əksinə, son günlər, xüsusilə səhər saatlarında bir sıra marşrutlarda intervalların uzanması və avtobuslarda yaranan texniki problemlər sərnişinlərin gündəlik hərəkətini çətinləşdirir. Bəs Bakı şəhərində marşrut xətlərinə rekord sayda – 2530 avtobus cəlb edildiyi açıqlanırsa, niyə sərnişinlər hələ də 30-40 dəqiqə avtobus gözləməli olurlar? Avtobusların sayının artırılması intervalların azalmasına niyə hər zaman gətirib çıxarmır?
Bu gün də həmin istiqamətdə hərəkət edən avtobuslardan birinin yolda xarab olması sərnişinlərin yolunu yarımçıq qoyub. Avtobusdan düşən sərnişinlər təxminən 20 dəqiqə piyada getməli olublar. Belə hallar avtobusların sayından əlavə, onların texniki vəziyyəti və xətt üzrə hərəkətin operativ idarə olunması məsələsini də gündəmə gətirir.
Musavat.com-a daxil olan şikayətlərə görə, xüsusilə səhər pik saatlarında bəzi marşrut avtobuslarının hərəkətində ciddi gecikmələr yaşanır. Sakinlərdən biri 6 nömrəli marşrut avtobusunu 1 saylı “ASAN xidmət” mərkəzinin yaxınlığındakı dayanacaqda 40 dəqiqədən çox gözləməli olduğunu bildirib. Sərnişinlərin sözlərinə görə, avtobusların intervallarının pozulması və yaranan sıxlıq səbəbindən insanlar işə və digər ünvanlara vaxtında çata bilmirlər.
Bu vəziyyət bir tərəfdən paytaxtda ictimai nəqliyyata tələbatın artdığını, digər tərəfdən isə marşrutların real sərnişin axınına uyğun idarə olunması məsələsini gündəmə gətirir. Yol-nəqliyyat infrastrukturunda aparılan dəyişikliklər, yeni marşrutların təşkili və avtobus parkının genişləndirilməsi fonunda sərnişinlər daha rahat və proqnozlaşdırılan nəqliyyat xidməti gözləyirlər. Lakin avtobusların gecikməsi və dayanacaqlarda uzun növbələrin yaranması bu gözləntilərin tam qarşılanmadığını göstərir.
Məsələ ilə bağlı Musavat.com Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinə (AYNA) müraciət edib.
AYNA-nın mətbuat katibi Tural Orucov sorğumuza cavab olaraq bildirib ki, Bakı şəhərində ilk dəfə olaraq rekord sayda – 2530 avtobus marşrut xətlərinə cəlb edilib. Bununla yanaşı, metro xətlərinin ayrılması layihəsi çərçivəsində 8 ekspres təşkil olunub və 28 müntəzəm xətt gücləndirilib.
AYNA rəsmisinin sözlərinə görə, marşrutların hərəkət sxemi üzrə yaranan nəqliyyat sıxlığı bəzən intervalların artmasına səbəb ola bilir. “Marşrutların hərəkət sxemi üzrə yaranan nəqliyyat sıxlığı bəzən intervalların artmasına səbəb ola bilir. Hazırda AYNA-nın Sərnişin Daşımalarının Monitorinq Mərkəzi tərəfindən avtobusların intervalı izlənilir və vəziyyətə nəzarət edilir. Eyni zamanda avtobusların hərəkət sxemi üzrə rahat hərəkət edə bilməsi üçün polis orqanları ilə birgə fəaliyyət göstərilir”, – deyə Tural Orucov bildirib.
Beləliklə, avtobusların sayının artırılması ilə yanaşı, onların xətt üzrə fasiləsiz və vaxtında hərəkətinin təmin edilməsi, texniki nasazlıqlar zamanı əvəzedici avtobusların operativ xəttə buraxılması və nəqliyyat sıxlığının marşrut intervallarına təsirinin minimuma endirilməsi məsələsi də aktuallığını qoruyur.
