Xəbər verildiyi kimi, bir neçə gün qabaq Tiflisdə uşaq bağçalarında qeydə alınmış kütləvi zəhərlənmənin səbəbi bəlli olub. Laboratoriya müayinələrinin nəticələrinə görə, bu norovirusdur. Bu barədə Gürcüstanın Xəstəliklərə Nəzarət üzrə Milli Mərkəzindən bildirilib.
Qeyd olunub ki, bu patogen virus bütün dünyada virus mənşəli qastroenteritin əsas səbəbidir. Gürcüstan üzrə məlumatlara əsasən, virus mənşəli qastroenterit hallarının 40-45 faizinin səbəbi məhz norovirusdur. Mərkəzdən həmçinin, bildirilib ki, zəhərlənmə əlamətləri olan bütün uşaqların vəziyyəti hazırda qənaətbəxşdir, ciddi ağırlaşmalar müşahidə edilməyib və əksəriyyəti artıq sağalma mərhələsindədir.
Xatırladaq ki, Tiflisdə yerləşən 20 uşaq bağçasında kütləvi zəhərlənmə sentyabrın 17-də baş verib. İntoksikasiya əlamətləri müşahidə olunan 100-dən çox uşaq xəstəxanaya yerləşdirilib. Faktla bağlı Gürcüstanın Maliyyə Nazirliyinin İstintaq Xidməti insan həyatı və sağlamlığı üçün təhlükə yaradan qida məhsullarının hazırlanması və reallaşdırılması maddəsi üzrə istintaq aparır. Norovirusla bağlı xəstəlik halları eyni vaxtda Tiflisin 20 uşaq bağçasında qeydə alınıb. Onlardan 7-si karantin məqsədilə bağlanıb.
Qeyd edək ki, norovirus mədə və bağırsaqların iltihabına səbəb olan, son dərəcə yüksək yoluxuculuğa malik virus növü sayılır.
İnfeksiya adətən qusma, qarın ağrısı, ishal, bəzi hallarda isə hərarətlə müşayiət olunur. Xəstəlik əksər hallarda 1-3 gün ərzində keçir. Mütəxəssislərin diqqət çəkdiyi əsas risk isə güclü qusma və ishal zamanı orqanizmin susuzlaşmasıdır. Bu virus ən çox hansı şəraitdə inkişaf edir? Azərbaycanda bu hadisədən hansı nəticə çıxarılmalıdır?
Həkim-pediatr Vaqif Qarayev Musavat.com-a açıqlamasında deyib: “Burada diqqəti çəkən əsas məqam odur ki, Tiflisdə 20 ayrı-ayrı yerdə yerləşən bağçada kütləvi zəhərlənmə baş verib. Üstəlik, təkcə uşaqlar deyil, bağça əməkdaşları, tərbiyəçilər və digər işçilər də yoluxublar. Görünür, virusla çirklənmiş ərzaq və qida məhsulu bir mənbədən götürülərək ayrı-ayrı bağçalarda istifadə olunub. Başqa cür necə ola bilər? Bağçanın biri şəhərin bu başında, digəri digər başında yerləşir, onlar bir-birini yoluxdura bilməz.
Bu baxımdan, çox diqqətçəkən informasiyadır. Norovirus qida vasitəsilə yoluxa bilir, eyni zamanda insandan insana da keçir. Daha çox norovirusla çirklənmiş qida məhsullarından istifadə zamanı uşaqlar, eləcə də böyüklər yoluxa bilərlər.
Bu hadisəni ciddi hesab edirəm. Bunu ona görə xüsusilə qeyd edirəm ki, çox şükür, Azərbaycanda uşaq kollektivlərində belə kütləvi zəhərlənmə halları haqqında çoxdan məlumat eşitmirəm. Amma biz həddindən artıq diqqətli olmalıyıq. Gürcüstan bizim qulağımızın dibindədir, eyni coğrafiyadayıq. Ümumiyyətlə, bizdə nə baş verirsə, orada, orada nə baş verirsə, bizdə müşahidə oluna bilər. Tiflis çox yaxındır. Bəlkə də eyni mənbədən ərzaq və qida məhsulları almışıqsa, bu ehtimal bizi daha çox narahat etməlidir”.
Həkim qeyd edir ki, bağçalarda valideynin uşağına hansı ərzağın haradan alındığını və necə hazırlandığını yoxlamaq, nəzarət etmək imkanı yoxdur: “Amma məktəb məsələsi bir qədər fərqlidir. Mən ümumiyyətlə valideyn olaraq anlamıram ki, uşaq məktəbdə niyə yemək yeməlidir, niyə məktəb bufetindən qidalanmalıdır?
Ən vacib məqam budur: səhər tezdən uşaq evdə yemək yeməlidir. Məktəbli məktəbə ac getməməlidir – buna 50 dəfə nida işarəsi qoyuram. İkincisi, çantasına nəsə qoymaq olar. Məsələn, adi pendirdən buterbrod hazırlayıb qoymaq mümkündür. Daha yaxşısı isə vitaminli meyvələr, kalorisi daha çox olan quru meyvələrdir.
Ümumiyyətlə, dünyada uşaqlar üçün qadağan olunan qida məhsulları var. Rəngli, qazlı içkilər qadağandır. Mən energetik içkiləri də bu kateqoriyaya aid edirəm. Amma bunlar bufetlərdə də satılır. Trans yağlarla hazırlanmış yarımfabrikatlar və ya hazır məhsullar olmaz. Fastfud məhsulları, çipsilər, müxtəlif şirniyyatlar, eləcə də uşaqlar üçün uyğun olmayan digər bu tip məhsulların satışı qadağandır.
İnsaf naminə deyək ki, AQTA da bunları qadağan edib. Məktəb bufetlərində sadaladığım məhsulların satışına və istehlakına icazə verilmir, bununla bağlı rəsmi qadağa var. İndi buna əməl olunur, ya olunmur, onu mən deyə bilmərəm. Mən məktəb bufetlərini görmürəm axı.
Bu baxımdan, əvvəldə dediyim kimi, uşağın çantasına adi bir buterbrod, bir də adi su qoymaq olar. Mən küçədə, avtobusda, metroda uşaqları görürəm, çantalarında su butulkası olur. Bu, mənim xoşuma gəlir.
Hər şeyi hökumətin boynuna qoymaq da düzgün deyil. Düşünürəm ki, hər kəs özü özünü qorumağı bacarmalıdır. Bizdə bunun yayılma ehtimalı varmı? Bilmirəm. Bizdə də istehlak olunan həmin qida məhsulları virusla çirklənibsə, yoluxma baş verə bilər, yoxsa baş verməyəcək – bunu əvvəlcədən demək mümkün deyil”.//musavat.com
