Bunu ekoloq Elçin Məmmədov Demokrat.az-a açıqlamasında deyib.
O qeyd edib ki, dağlıq və meşəlik ərazilərdə onların əsas qida mənbələrinin azalması bu heyvanları kəndlərə tərəf yönəldir:
“Meşələrdə qida çatışmazlığı əsasən iqlim dəyişikliyi, ağacların məhv edilməsi və insan təsərrüfat fəaliyyətinin artması ilə bağlıdır. Xüsusilə payız mövsümündə ayılar qış yuxusuna hazırlaşdıqları üçün daha çox enerji və qida ehtiyatı toplamağa çalışırlar. Bu səbəbdən heyvanlar kəndlərdə daha asan əldə edilən qida mənbələrinə, yəni mal-qara və qoyunlara hücum edirlər. Digər mühüm amil isə ayıların təbii mühitinə yaxın ərazilərdə kənd təsərrüfatının genişlənməsidir. Belə hallarda ayılar özünü təhlükədə hiss etmir, çünki yem axtarışı onların instinktiv davranışıdır”.
Ekoloq bildirib ki, bu hücumlar həm də meşə ekosistemində tarazlığın pozulduğunu göstərir:
“Yırtıcıların qida zəncirindəki rolu zəiflədikcə, onların davranışı da dəyişir. Ayıların kəndlərə yaxınlaşması təkcə təsərrüfat üçün deyil, həm də insanlar üçün təhlükə yaradır. Ona görə də bu məsələdə həm Ekologiya və Təbii Sərvətlər Nazirliyinin, həm də yerli icmaların birgə tədbirləri vacibdir.
Ən doğru yanaşma meşəliklərdə ayıların təbii qida bazasının qorunması, kəndlərdə isə tövlələrin daha yaxşı mühafizəsi və qoruyucu baryerlərin yaradılmasıdır. Əks halda, ayıların kəndlərə hücumu daha da arta bilər”.
