Çin hakimiyyəti internetdə “mənfi emosiyaları qəsdən yaymaqda” ittiham olunan istifadəçilərə qarşı yeni kampaniya elan edib.
Gündəm24.az xəbər verir ki, bu barədə “Reuters” agentliyi məlumat yayıb.
Məlumatda bildirilir ki, Çinin Kiberməkan İdarəsinin başladığı iki aylıq tədbirlər planı sosial şəbəkələr, qısa video platformaları, canlı yayımlar və şərh bölmələrini əhatə edəcək.
Kampaniya çərçivəsində yalnız zorakılıq çağırışları və saxta xəbərlər deyil, həm də “həddindən artıq bədbinlik yayan” məzmun, məsələn, “oxumağın və işləməyin faydasız olduğu” barədə paylaşımlar da hədəfə alınacaq.
Qadağa həmçinin özünü dəyərsizləşdirən, kədər və ümidsizlik ifadə edən, eləcə də süni intellekt vasitəsilə zorakı səhnələr hazırlayan materiallara da şamil ediləcək.
Bu cür kontent yayan platformalar və müəlliflər cəza və “düzəliş tədbirləri” ilə üzləşəcəklər.
Qeyd edək ki, bu, ilk belə təşəbbüs deyil.
Belə ki, 2021-ci ildən bəri Çin rəhbərliyi ən azı beş dəfə oxşar kampaniya həyata keçirib.
Mövlam RZALI,
Gündəm24.az
