Azərbaycanın bəzi bölgələrində dabaq xəstəliyinin yayılması ciddi narahatlıq doğurur. Belə ki, Naxçıvanda bunun sürətlə artdığı və gizli saxlanıldığı iddia edilir. Bildirilir ki, artıq minlərlə mal-qara tələf olmaq təhlükəsi ilə üz-üzədir. Oxşar mənzərə Astaranın bir neçə kənd və qəsəbəsində də müşahidə olunur. Xəstəlik əsasən Seləkəran, Giləkəran, Kələdəhnə, Böyük Şahağacı, Suparibağ, Şiyəkəran və Ərçivan ərazilərində qeydə alınıb.
Naxçıvan və Astarada nə baş verir? Dabaq xəstəliyi və mümkün təhlükələri nələrdir?
Gündəm24.az xəbər verir ki , Globalinfo.az-a danışan heyvandarlıq sahəsi üzrə ekspert Mirağa Abdullayev deyib ki, dabaq xəstəliyi yoluxucu və virus mənşəli xəstəlikdir:
“Həm ev, həm də vəhşi təkdırnaqlı və cütdırnaqlı heyvanlar arasında sürətlə yayılır. Xəstəlik əsasən mal-qarada müşahidə olunur, lakin qoyun, keçi və donuzlar da yoluxa bilər. Virus çox davamlıdır, yəni torpaqda, otlaqda və hətta geyim, ayaqqabı və alətlərin üzərində uzun müddət yaşaya bilir. Buna görə də yoluxma riski çox yüksək sayılır”.
Ekspert bildirib ki, dabağın qarşısını almağın ən effektiv yolu mütəmadi vaksinasiya və ciddi baytarlıq nəzarətidir:
“Xəstə heyvanlar dərhal ayrı saxlanmalı, otlaq və su mənbələri dezinfeksiya edilməlidir. Fermerlər xəstə və sağlam heyvanları eyni yerdə saxlamaqdan, həmçinin birgə yemdən istifadə etməkdən çəkinməlidirlər. Əllər, geyim və alətlər dezinfeksiyaedici məhlullarla təmizlənməlidir. Əgər kənddə dabaq aşkarlanıbsa, həmin əraziyə karantin tətbiq edilməli, heyvanların hərəkəti, alqı-satqısı və kəsimi qadağan olunmalıdır. Ümumilikdə vaxtında peyvəndləmə, nəzarət və təmizliyə riayət olunması xəstəliyin qarşısını almağın əsas şərtləridir”.
Globalinfo.az məsələ ilə bağlı Kənd Təsərrüfatı Nazirliyinə sorğu ünvanlayıb.
Qurumdan bildirilib ki, baytarlıq nəzarəti funksiyası Azərbaycan Qida Təhlükəsizliyi Agentliyinin (AQTA) tabeliyindədir.
AQTA-nın İctimaiyyətlə əlaqələr sektorunun müdiri Hüsniyyə Həsənova saytımıza açıqlamasında deyib ki, agentlik ölkədə və dünyada epizootik vəziyyəti daim diqqət mərkəzində saxlayır:
“Ölkədə heyvanların identifikasiyası və qeydiyyatı həyata keçirilir. Bu sistem heyvan xəstəliklərinin aşkarlanması, onlarla mübarizənin təşkili, habelə heyvan mənşəli məhsulların qida zənciri boyu izlənilməsində mühüm əhəmiyyət kəsb edir. Xüsusi təhlükəli xəstəliklərə görə epizootoloji şəraitin öyrənilməsi məqsədilə iri və xırdabuynuzlu heyvanlar arasında seroloji monitorinqlər keçirilir. Fərdi və fermer təsərrüfatlarında saxlanılan iri, o cümlədən xırdabuynuzlu heyvanlardan diaqnostik nümunələr götürülərək laborator sınaqları həyata keçirilir. Heyvan xəstəliklərin qarşısının alınması üçün heyvanların müntəzəm peyvəndlənməsi və sağlamlıq nəzarəti, təsərrüfatlarda biotəhlükəsizlik qaydalarına əməl olunması, qida məhsullarının təhlükəsiz emalı, saxlanması, ictimai maarifləndirmə, yaxud risk kommunikasiyası kimi mübarizə tədbirləri aparılır”.
Mövzu ilə bağlı Naxçıvan Muxtar Respublikası Kənd Təsərrüfatı Nazirliyinə sorğu ünvanlasaq da, cavabsız qalıb.
