Bu gün Nizami Zaman oğlu İsgəndərovun 60 illik yubileyi münasibətilə Qərbi Azərbaycan İcmasının Sumqayıt nümayəndəliyində tədbir keçirilib.
Gündəm24.az xəbər verir ki, tədbirdə Qərbi Azərbaycan İcmasının nümayəndələri, Sumqayıt nümayəndəliyinin idarə heyətinin və şura üzvləri, ziyalılar, ictimaiyyət nümayəndələri, təhsil işçiləri və gənclər iştirak ediblər.
Tədbiri giriş sözü ilə Qərbi Azərbaycan İcmasının Sumqayıt Şəhər nümayəndəliyinin sədri Ramiz İsmayılov açaraq yubilyarı səmimi qəlbdən təbrik edib. O, Nizami İsgəndərovun həm dövlət qulluğunda, həm də ictimai və xeyriyyə sahəsində qazandığı böyük xidmətlərdən bəhs edib.
Ramiz İsmayılov qeyd edib ki, Nizami müəllim yalnız bir vəzifə adamı deyil, həm də insanlara mərhəmət, qayğı və ədalət prinsiplərini həyatının əsas meyarına çevirən bir şəxsiyyətdir.
Daha sonra gənc fəal Məleykə Xankişiyeva Nizami İsgəndərovun həyat və fəaliyyəti haqqında geniş təqdimatla çıxış edib. O, bildirib ki, Nizami müəllimin ömür yolu xalqına və dövlətinə sədaqət nümunəsidir. Onun ictimai fəallığı, gənclərlə işləməyə və xeyriyyə işlərinə verdiyi önəm bir çoxlarının həyatında dərin iz buraxıb.
Məruzədə həmçinin vurğulanıb ki, Nizami müəllimin xeyirxahlıq və mərhəmət dolu davranışları onun atası, Zaman İsgəndərovun həyat fəlsəfəsindən qaynaqlanır. Bu nəcib xüsusiyyətlər bir ailə dəyərləri kimi nəsildən-nəsilə ötürülərək bu gün də yaşadılır.
Ardınca çıxış edən natiqlər yubilyarın həyat yoluna və fəaliyyətinə həsr olunmuş səmimi fikirlər səsləndiriblər.QAİ-nin Sumqayıt şəhər nümayəndəliyinin
idarə heyətinin üzvü Xankərəm Vəliyev çıxışında qeyd edib ki:
“Nizami müəllim uzun illərdir ki, dövlətçilik ənənələrinə sadiq, xalqa yaxın və qayğıkeş bir insan kimi tanınır. Onun gördüyü işlər, davranış tərzi və insanlara münasibəti gənclər üçün əsl örnəkdir. Belə insanlar cəmiyyətin mənəvi dayaqlarıdır.”
Nümayəndəliyin ağsaqqallar şurasının sədri Əbülfəz Əbilov nitqində vurğulayıb ki:
“Nizami müəllimin fəaliyyətində xeyirxahlıq, mərhəmət və insanpərvərlik ön plandadır. O, bu dəyərləri daim yaşadır. Xüsusilə şəhid ailələrinə, aztəminatlı insanlara və yardıma ehtiyacı olanlara göstərdiyi qayğı onun mənəvi zənginliyinin göstəricisidir.”
Uşaq və Yeniyetmələrin Yaradıcılıq Mərkəzinin direktoru Əntiqə Rzayeva çıxışı edərək bildirib ki:
“Nizami müəllim gənclərin və təhsilin inkişafına daim diqqətlə yanaşır. O, gənclərin yaradıcılığa və elmə marağının artması üçün hər zaman dəstək göstərib. Bu, onun gələcəyə inamının və vətənpərvərlik ruhunun təzahürüdür.”
Ziyalılar Şurasının üzvü Akif Şahbazov çıxışında Nizami müəllimin şəxsiyyətini yüksək dəyərləndirərək qeyd edib ki:
“Nizami müəllim həm ziyalı, həm də ləyaqətli bir vətəndaş kimi cəmiyyətdə böyük hörmət qazanıb. O, təvazökarlığı, insanlara olan səmimi münasibəti ilə ətrafında sevgi və etimad mühiti formalaşdırıb.”
Nümayəndəliyin sədr müavini İlkin Şirinov çıxışında qeyd edib ki:
“Nizami müəllim Qərbi Azərbaycan İcmasının Sumqayıt nümayəndəliyinin formalaşmasında, fəaliyyət istiqamətlərinin müəyyənləşməsində və təşkilatlanmasında mühüm rol oynayıb. O, həm Qərbi Azərbaycan ideyasına, həm də ümumilikdə milli dəyərlərə sadiq bir şəxsdir.”
Qərbi Azərbaycan İcmasının nümayəndəsi Faiq Kərimov isə çıxışında əsas məqamlara toxunaraq vurğulayıb ki:
“Nizami İsgəndərov Qərbi Azərbaycan həqiqətlərinin dünyaya çatdırılması istiqamətində yorulmadan çalışır. O, Qərbi Azərbaycan ideyasını yalnız ictimai fəaliyyət səviyyəsində deyil, həm də beynəlxalq platformalarda təbliğ edir, gənclərin bu istiqamətdə maariflənməsinə xüsusi önəm verir.”
Tədbirin sonunda yubilyar Nizami İsgəndərov çıxış edərək göstərilən diqqətə və səmimi sözlərə görə tədbir iştirakçılarına dərin minnətdarlığını bildirib:
“Bu tədbir mənim üçün sadəcə yubiley deyil, həm də bir hesabat günüdür. Həyatda ən böyük mükafat insanın gördüyü işlərə verilən mənəvi dəyər və xalqın sevgisidir. Mən bu sevgini hiss etdiyim üçün özümü xoşbəxt sayıram.”
Daha sonra o əlavə edib ki:
“Biz bu yolda dayanmadan, yorulmadan çalışmalıyıq. Hər birimizin ən böyük arzusu odur ki, bir gün Qərbi Azərbaycan torpaqlarına qayıdaq və bu kimi tədbirlərimizi doğma yurdumuzda – o müqəddəs torpaqlarda qeyd edək. Mən əminəm ki, bu gün gələcəkdə mütləq reallığa çevriləcək.”
Sonda Nizami İsgəndərov Qərbi Azərbaycan İcmasının rəhbərliyinə, tədbirdə iştirak edən bütün dostlarına və həmkarlarına bir daha təşəkkürünü bildirib.
Tədbir iştirakçıları sonda yubilyarı bir daha təbrik edərək ona möhkəm cansağlığı, uzun ömür və gələcək fəaliyyətində uğurlar arzulayıblar.
