NATO ölkəsindən sensasion açıqlama: Ukraynaya silah tədarükü “böyük səhv” adlandırıldı

Gündəm24.az  xəbər verir ki, Bolqarıstan parlamentinin deputatı Angel Georgiyev ölkəsinin Ukraynaya böyük həcmdə silah göndərdiyini etiraf edərək bunu “böyük səhv” adlandırıb. O, TASS-a müsahibəsində bildirib ki, Bolqarıstan bu addımı atmamalı idi.

Deputat həmçinin NATO çərçivəsində ölkədə yerləşən ABŞ bazalarının Ukraynaya silah daşınmasında istifadə olunması ilə bağlı sualdan yayınsa da, bunun “məntiqli göründüyünü” deyib. Georgiyev, Ukraynaya göndərilən Bolqarıstan silahlarının sayının çox olduğunu vurğulayıb.

Siyasətçi Qərb mediasını da sərt tənqid edib. Onun sözlərinə görə, beynəlxalq media yalnız Ukrayna müharibəsinə fokuslanır, Afrikadakı humanitar böhranlar və hər gün ölən insanlar isə diqqətdən kənarda qalır. Georgiyev bildirib ki, həqiqətlər manipulyasiya edilmədən ictimaiyyətə çatdırılmalıdır.

Rusiyaya parlament nümayəndə heyəti ilə səfər etdiyini xatırladan deputat, Ursula fon der Leyen və Kaja Kallas barədə də sərt fikirlər səsləndirib. O, hər iki Avropa rəsmisinin “Avropa üçün təhlükəli qərarlar” qəbul etdiyini iddia edib və onların vəzifədən uzaqlaşdırılmasını istədiklərini bildirib.

Sədaqət Həsənova

Gündəm24.az