Prezident İlham Əliyev Şuşada keçirilən IV Şuşa Qlobal Media Forumunun açılış mərasimində çıxışı zamanı Sumqayıtın sovet dövründə üzləşdiyi ekoloji problemlərə də toxunub.
Gündəm24.az xəbər verir ki, dövlət başçısı bildirib ki, Azərbaycan uzun illər öz təbii sərvətlərindən lazımi şəkildə faydalana bilməyib.
“Biz ancaq özümüzə güvənə bilərik. Baxmayaraq ki, Azərbaycanın çox böyük sərvətləri olub, əvvəllər onlardan heç biri, sözün əsl mənasında, Azərbaycan xalqının inkişafında rol oynamırdı. Çünki biz daha çox ümumittifaq büdcəsinə verirdik, heç nə almırdıq. Bizdən neft aparılırdı, Sumqayıt şəhəri ekoloji fəlakətə uğramışdı. Sovet İttifaqı dağılanda isə hər şey viran qalmışdı, torpaqlarımız əldən getmişdi”, – Prezident qeyd edib.
İlham Əliyev əlavə edib ki, bu səbəbdən Azərbaycan yalnız öz gücünə və dövlətinə arxalanmalıdır:
“Bu mənada, ancaq özümüzə və dövlətə güvənməliyik, birlik heç vaxt sarsılmamalıdır. Bu gün Azərbaycan cəmiyyətində olan birliyə oxşar mənzərə tapmaq çətindir, çünki bu, insanların zehnindən və ürəyindən gəlir.”
