Kənd Təsərrüfatı Nazirliyi yanında İctimai Şuranın yeni formalaşdırılmış tərkibinin ilk iclasında rəhbərlik məsələsinə baxılıb. İclasın yekununda keçirilən səsvermə nəticəsində Azərbaycan Quş əti, Yumurta İstehsalçıları və İxracatçıları Assosiasiyası İctimai Birliyinin rəhbəri Mürvət Tapdıq oğlu Həsənli İctimai Şuranın sədri vəzifəsinə yekdilliklə seçilib.
Qərbi Azərbaycan İcması adından Qərbi Azərbaycan İcmasının Qəyyumlar Şurasının sədri Mürvət Həsənlinin bu məsuliyyətli və mühüm vəzifəyə seçilməsini məmnunluqla qarşılayır və onu ürəkdən təbrik edirik.
Mürvət Həsənli aqrar sahədə uzunillik fəaliyyəti, real sektor üzrə praktiki təcrübəsi və ictimai institutlarla işləmək bacarığı ilə seçilən tanınmış mütəxəssisdir. İnanırıq ki, onun rəhbərliyi ilə Kənd Təsərrüfatı Nazirliyi yanında İctimai Şura dövlət qurumları ilə ictimaiyyət arasında dialoqun daha da güclənməsinə, sahə üzrə qərarların qəbulunda ictimai iştirakçılığın genişlənməsinə və aqrar sektorun dayanıqlı inkişafına mühüm töhfə verəcək.
Qərbi Azərbaycan İcmasının Qəyyumlar Şurasının sədri kimi Mürvət Həsənlinin fəaliyyəti onun ictimai etimada əsaslanan prinsipial mövqeyi və məsuliyyətli yanaşması ilə yanaşı, sonsuz vətənpərvərliyi və dövlətçiliyimizə sədaqəti ilə bağlıdır. Bu etimadın yeni platformada da uğurla doğruldulacağına əminik.
Qeyd edək ki, Mürvət Tapdıq oğlu Həsənli 23 noyabr 1970-ci ildə Qərbi Azərbaycanda – Çəmbərək rayonunun Ağbulaq kəndində anadan olub. Hərbi xidmətini başa vurduqdan sonra əmək fəaliyyətinə Gəncə şəhərində başlayıb.1997-ci ildə Gəncə Kənd Təsərrüfatı Akademiyasının (indiki Azərbaycan Dövlət Aqrar Universiteti) iqtisadiyyat fakültəsini bitirib. Sonrakı illərdə sahibkarlıq fəaliyyətini iaşə sektorunda davam etdirərək “Xəmsə” restoranını yaradıb. 2008-ci ildən etibarən kənd təsərrüfatı sahəsində biznes fəaliyyəti ilə məşğul olub və bu sahədə uğurlu nəticələr əldə edib. 2022-ci ilin fevral ayından isə “Azərbaycan Quş əti, Yumurta İstehsalçıları və İxracatçıları Assosiasiyası” İctimai Birliyinin İdarə Heyətinin sədri kimi fəaliyyət göstərir.
Mürvət müəllimə Kənd Təsərrüfatı Nazirliyi yanında İctimai Şuranın sədri kimi yeni vəzifəsində uğurlar arzulayır, ona möhkəm cansağlığı və davamlı nailiyyətlər diləyirik.
