29 noyabr 2025-ci il tarixində Qərbi Azərbaycan İcmasının Nizami rayon nümayəndəliyində Vedi rayonunun Xalisa kəndi əhalisinin deportasiya olunmasının 37-ci ildönümünə həsr olunmuş tədbir keçirilib.
Tədbirin əvvəlində Azərbaycan Respublikasının Dövlət Himni səsləndirilib, Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad olunub.
Qərbi Azərbaycan İcmasının Nizami rayon nümayəndəsi Xəqani Səfərov çıxış edərək əvvəlcə İcma sədri, millət vəkili Əziz Ələkbərlinin salamını tədbir iştirakçılarına çatıraraq bildirib ki, deportasiya təkcə insanların ev-eşiyindən qoparılması deyil, həm də onların izlərinin, yaddaşının məhv edilməsinə yönəlmiş sistemli siyasətin nəticəsidir
Tədbirdə Qərbi Azərbaycan İcması Ağsaqqallar Şurasının sədr müavini, Vedi rayon icmasının sədri, əməkdar elm xadimi, professor Vaqif Şadlinski, Milli Məclisin deputatı, əslən Vedi rayon Xalisa kəndindən olan Pərvanə Vəliyeva, Xalisa kənd icma sədri Yəhya Səfərov, eləcə də deportasiyanın canlı şahidləri – Söhbət Novruzova, Lətifə Bəşirova, Bəsdi Babayeva və başqaları çıxış ediblər.
Çıxış edənlər 1988-ci ildə Xalisa kəndində azərbaycanlıların üzləşdiyi zorakılıqlar, amansızlıq və deportasiya zamanı baş verən faciələr barədə ətraflı danışıblar. Deportasiya şahidi Söhbət Novruzova həmin dövrü belə xatırlayıb:
“Evimizin qapısını bağlamağa belə imkan vermədilər. O günlərin ağrısı heç vaxt unudulmur.”
Deputat Pərvanə Vəliyeva Azərbaycanın bu tarixi ədalətsizliyin dünya ictimaiyyətinə çatdırılması üçün ardıcıl fəaliyyət göstərdiyini vurğulayaraq bildirib ki, bu ağır faciənin tanıdılması və xalqımızın dədə-baba torpaqlarına sülh yolu ilə qayıdışı bu gün dövlətimizin əsas prioritetlərindən biridir.
Tədbirin sonunda Xalisa kəndinin tədbirlərində davamlı fəallıq göstərən kənd sakinlərinə təşəkkürnamələr, habelə yeni üzvlərə üzvlük vəsiqələri təqdim olunub.
Sonda xatirə şəkilləri çəkilib.
