Gündəm24.az xəbər verir ki, Qərbi Azərbaycan İcmasının Sumqayıt şəhər nümayəndəliyində 2025-ci ilin yekunlarına və il ərzində görülmüş işlərə dair geniş hesabat xarakterli iclas keçirilib. Tədbirdə Qərbi Azərbaycan İcmasının Sumqayıt nümayəndəliyinin İdarə Heyətinin üzvləri, qəsəbə icmalarının sədrləri, ağsaqqallar, qadınlar və gənclər şuralarının nümayəndələri, eləcə də şəhər ictimaiyyətinin fəalları iştirak ediblər.
İclasdan öncə Azərbaycan xalqının Ümummilli Lideri Heydər Əliyevin əziz xatirəsi və ölkəmizin ərazi bütövlüyü uğrunda canlarını fəda etmiş şəhidlərimizin ruhu bir dəqiqəlik sükutla yad edilib.
Tədbiri giriş sözü ilə açan Qərbi Azərbaycan İcmasının Sumqayıt şəhər nümayəndəliyinin sədri Ramiz İsmayılov 2025-ci il ərzində nümayəndəlik tərəfindən həyata keçirilmiş fəaliyyətlər barədə ətraflı hesabatla çıxış edib. O, qeyd edib ki, il ərzində Qərbi Azərbaycan həqiqətlərinin təbliği, deportasiya olunmuş soydaşlarımızın tarixi yaddaşının qorunması, ictimai-siyasi maarifləndirmə və təşkilatlanma istiqamətində mühüm işlər görülüb. Qərbi Azərbaycan İcması Sumqayıt Nümayəndəliyi olaraq 2025-ci il ərzində fəaliyyətimizi sistemli və məqsədyönlü şəkildə qurmağa çalışmışıq. İl ərzində nümayəndəliyimizdə 9 iclas, 20-dən artıq ictimai və maarifləndirici tədbir keçirilmiş, şəhər və ölkə səviyyəli 24 müxtəlif tədbirdə fəal iştirak təmin olunmuşdur.
Eyni zamanda, sosial yönümlü fəaliyyətimiz xüsusi diqqətdə saxlanılmışdır. Son iki il ərzində müraciət edən 131 nəfər Qərbi Azərbaycanlının işlə təmin olunmasına dəstək göstərilmiş, sağlamlıq və məişət problemləri ilə bağlı müraciətlərə mütəmadi baxılmışdır. Aparılan siyahıyaalma işləri nəticəsində Sumqayıt şəhərində 129 mindən artıq Qərbi Azərbaycanlının yaşadığı müəyyən edilmiş, onların tarixi yurd yerləri üzrə bölgüsü sistemləşdirilmişdir. Bu rəqəmlər bizim üzərimizə düşən məsuliyyətin miqyasını daha da artırır və bir daha göstərir ki, qarşıdakı illərdə fəaliyyətimizi daha da gücləndirməliyik.
Ramiz İsmayılov çıxışında vurğulayıb ki, nümayəndəlik tərəfindən müxtəlif formatlarda — dəyirmi masalar, anım tədbirləri, ictimai müzakirələr, maarifləndirici görüşlər və mədəni tədbirlər təşkil olunub. Bu tədbirlər Qərbi Azərbaycandan olan soydaşlarımızın hüquqlarının beynəlxalq ictimaiyyətə çatdırılması baxımından mühüm əhəmiyyət daşıyır.
Daha sonra Corat qəsəbə icmasının sədri Nazim Hüseynov çıxış edərək qəsəbə üzrə aparılan təşkilati işlər, əhali ilə keçirilən görüşlər və yerli icmanın fəallaşdırılması istiqamətində görülən tədbirlər barədə məlumat verib. Onun çıxışında Corat qəsəbəsi üzrə Ağsaqqallar Şurası, Qadınlar Şurası və Gənclər Şurasının yaradılması təklifi irəli sürülüb.
Müzakirələrdən sonra qeyd olunan şuraların yaradılması məsələsi iştirakçılar tərəfindən geniş şəkildə dəstəklənib və yekdilliklə qəbul edilib. Bu qərar yerli icma fəaliyyətinin daha sistemli və davamlı şəkildə təşkilinə xidmət edən mühüm addım kimi qiymətləndirilib.
Mədəni irsin qorunması və təbliği ilə bağlı çıxış edən nümayəndəliyin İdarə heyətinin üzvü Akif Şahbazov çıxışında Qərbi Azərbaycan mədəni irsinin, xüsusilə də Qərbi Azərbaycan yallılarının qorunması və gələcək nəsillərə ötürülməsinin vacibliyini ön plana çəkib. O bildirib ki, yallılar təkcə folklor nümunəsi deyil, həm də deportasiya olunmuş soydaşlarımızın tarixi kimliyini və birliyini ifadə edən mühüm mədəni dəyərdir.
Akif Şahbazov bu istiqamətdə yallılara həsr olunmuş xüsusi mədəni-kütləvi tədbirin keçirilməsini təklif edib. Təklif iştirakçılar tərəfindən müsbət qarşılanıb və gələcək fəaliyyət planına salınması məqsədəuyğun hesab edilib.
Media və informasiya siyasətinin vacibliyini əsas məsələ hesab edən nümayəndəliyin sədr müavini İlkin Şirinov çıxışında 2025-ci il ərzində icmanın mətbuat və media ilə əlaqələri barədə ətraflı məlumat verib. O qeyd edib ki, Qərbi Azərbaycan həqiqətlərinin ictimaiyyətə düzgün və sistemli çatdırılması üçün yerli və respublika səviyyəli media qurumları ilə əməkdaşlıq genişləndirilib. İlkin Şirinov vurğulayıb ki, yazılı və elektron mediada, eləcə də sosial şəbəkələrdə aparılan maarifləndirici fəaliyyət icmanın tanınmasına və mövqeyinin güclənməsinə ciddi töhfə verib. Bu istiqamətdə fəaliyyətin daha da intensivləşdirilməsinin vacibliyi qeyd olunub.
İclasda Sumqayıt şəhər Corat qəsəbəsi üzrə icra nümayəndəsi Elvariz Əliyev və Tağıyev qəsəbəsinin icra nümayəndəsi Lalə Hacıyeva çıxış edərək, Qərbi Azərbaycan İcmasının fəaliyyətini yüksək qiymətləndiriblər. Onlar icmanın həyata keçirdiyi tədbirlərin ictimai əhəmiyyətini vurğulayaraq, yerli icra strukturlarının gələcəkdə də bu fəaliyyətlərə dəstək göstərməyə hazır olduqlarını bildiriblər.
İcmada Gənclərin rolu və gələcək perspektivlərindən danışan QAİ Sumqayıt nümayəndəliyinin Gənclər Şurasının sədri Fuad Məmmədov çıxışında gənclərin Qərbi Azərbaycan məsələsində fəal mövqeyinin formalaşdırılmasının vacibliyindən danışıb. O qeyd edib ki, gənclər milli yaddaşın qorunması, tarixi həqiqətlərin təbliği və ictimai təşəbbüslərin həyata keçirilməsində aparıcı qüvvə olmalıdır.
Tədbirin sonunda Sevindik Hüseynov çıxış edərək, Qərbi Azərbaycan həqiqətlərinin təbliği istiqamətində QAİ Sumqayıt nümayəndəliyinin fəaliyyətini nümunəvi hesab edib və bu işlərin digər şəhər və rayon nümayəndəlikləri üçün örnək olduğunu bildirib. Həmçinin qeyd edib ki, bu gün 80 yaşı olmasına baxmayaraq, ictimai və təşkilati fəaliyyətlərdə fəal iştirakını davam etdirir. Qərbi Azərbaycan İcmasının Sumqayıt Nümayəndəliyinin 2025-ci il ərzində gördüyü işlər bir daha göstərir ki, birliyimiz və məqsədyönlü fəaliyyətimiz nəticəsində mühüm nailiyyətlər əldə olunmuşdur.
Müzakirələrin yekununda Qərbi Azərbaycan İcmasının Sumqayıt nümayəndəliyinin 2025-ci il üzrə fəaliyyəti iştirakçılar tərəfindən yekdilliklə yüksək qiymətləndirilmiş, qarşıdakı dövr üçün fəaliyyətin daha da gücləndirilməsi ilə bağlı müvafiq tövsiyələr qəbul olunmuşdur.
