Rusiya ordusu Ukraynada hərbi-sənaye və logistika obyektlərinə zərbələr endirib
Gündəm24.az xəbər verir ki, Rusiya Müdafiə Nazirliyinin məlumatına görə, gecə saatlarında Rusiya Silahlı Qüvvələri Ukraynanın Kiyev şəhərində, Kiyev vilayətində və Qara dənizdə yerləşən bir sıra hədəflərə yüksək dəqiqlikli silahlar və pilotsuz uçuş aparatları (PUA) ilə genişmiqyaslı zərbələr endirib.
Nazirliyin açıqlamasında bildirilir ki, hücumların əsas hədəfləri müdafiə sənayesi müəssisələri, PUA-ların saxlanma məntəqələri və logistika mərkəzləri olub.
Kiyevdə məlumat emalı mərkəzi, uzaqmənzilli PUA komponentlərinin və FP-5 «Flamingo» qanadlı raketlərinin mühərriklərinin istehsalı və saxlanması ilə əlaqələndirilən «Fire Point» logistika mərkəzi, həmçinin PUA-lar üçün döyüş başlığı komponentlərinin istehsal edildiyi bildirilən «Himvolokno» sənaye müəssisəsi hədəflər arasında göstərilib.
Bundan əlavə, Rusiya tərəfi FP-5 qanadlı raketlərinin və FP-9 ballistik raketlərinin hissələrinin saxlanıldığı iddia edilən «Kiyev» lokomotiv deposunun da vurulduğunu bildirib.
Kiyev vilayətində müdafiə sənayesi üçün polimerlər istehsal etdiyi bildirilən «Planeta Plastik» zavodunun hədəf alındığı qeyd olunub.
Rusiya Müdafiə Nazirliyinin məlumatına əsasən, Qara dənizdə, Odessa limanından təxminən 130 kilometr cənub-qərbdə hərbi və ikili təyinatlı materiallar daşıdığı iddia edilən quru yük gəmisinə də zərbə endirilib.
Hücumların nəticələri, obyektlərə dəymiş ziyanın miqyası və itkilər barədə məlumatlar müstəqil mənbələr tərəfindən təsdiqlənməyib.
Sədaqət Həsənova
Gündəm24.az
