İranda etirazlar 12-ci gün şiddətləndikcə, təhlükəsizlik və internet məhdudiyyətləri hava nəqliyyatına da təsir etdi. Türk Hava Yolları, AJet və Pegasus şirkətləri 9-10 yanvar 2026-cı il tarixlərində Tehran, Təbriz və Məşhədə uçuşları ləğv etdi. Aviaşirkətlər sərnişinlərə məlumat verildiyini açıqladı.
Gündəm24.az xəbər verir ki, İranın müxtəlif şəhərlərində baş verən etirazlar səbəbindən Türkiyənin bayraqdar aviaşirkəti Türk Hava Yolları (THY) 9-10 yanvar 2026-cı il tarixlərində Tehran, Təbriz və Məşhəd marşrutları üzrə cəmi 17 reysin ləğv olunduğunu açıqlayıb. Şirkət sərnişinlərə yenilənmiş uçuş məlumatları üçün rəsmi kanallarını yoxlamağı tövsiyə edib.
AJet şirkəti də eyni tarixlərdə Sabiha Gökçen Hava Limanından Tehrana altı reysin ləğv edildiyini bildirərək sərnişinləri uçuşun vəziyyəti barədə məlumatlandırıb. Pegasus Airlines isə Tehran və Təbrizə planlaşdırılan uçuşlarını İranda təhlükəsizlik riskləri və əməliyyat məhdudiyyətlərinə görə dayandırıb.
Aviaşirkətlər sərnişinlərə rezervasiya və geri ödəmə/dəyişdirmə seçimləri ilə bağlı rəsmi elanlara əməl etməyi və hava limanına getməzdən əvvəl uçuşun vəziyyətini yoxlamağı tövsiyə edirlər.
Sədaqət Həsənova
