Bazarlarda və zaman-zaman marketlərdə çərəzlərin üstü açıq formada satışda olduğunu görürük.
Bəs çərəzlərin üstü açıq saxlanılması nə dərəcədə təhlükəlidir?
Qida eksperti İlkin Şirnov Redaktor.az-a danışarkən bildirdi ki, təkcə çərəzə deyil, bütün məhsulların sanitar-gigiyenik normalarda satışının təşkil olunması birmənalı şəkildə həyata keçirilməlidir:
“Üstü açıq çərəzlər gəmiricilərin hücumuna məruz qala bilər. Əgər məhsulların üstü açıqdırsa, təbii ki, bir alıcı təmas edə bilər və digəri bunu sevməyə bilər. Bu kimi məsələlər çərəzlərin çirklənmə risklərinə gətirib çıxarır. Yəni şəffaf vitrin arxasında olmayan, açıq havada satılan çərəzlərdə belə çirklənmə halları yaşana bilər”.
Ekspert vurğuladı ki, çərəzlərin gigiyenik şəraitdə və şəffaf qapalı vitrinlərdən alınması tövsiyə olunur:
“Yol kənarında satılan çərəzlərin heç bir sağlam və yaxud da gigiyenik qaydalara əməl olunmuş satışından danışmaq mümkün deyil. Pis saxlanılmış şəraitdə göbələklərin inkişafı da mümkün ola bilir. Çərəzlərin tərkibindəki yağlar hava ilə təmasda oksidləşirlər. Nəticədə həmin o çərəzlərdə acı dad və pis qoxu yaranır. Bu səbəblərdən çərəzlər bağlı saxlanılmalıdır. Yaxşı olar ki, xüsusi qutularda hazırlanmış, paketlənmiş çərəzlərdən istifadə olunsun”.
