Son illərdə xüsusilə sosial şəbəkələrin təsiri ilə 3D dondurmalar sürətlə populyarlaşaraq həm uşaqların, həm də böyüklərin diqqət mərkəzinə çevrilib. Rəngarəng görnüşü və qeyri-adi formaları ilə seçilən bu məhsulların arxasında isə hansı qatqı maddələrinin istifadə olunduğu və onların sağlamlığa təsiri ilə bağlı suallar getdikcə daha çox müzakirə edilir. Bəs 3D dondurmaların tərkibindəki qida boyaları və digər əlavələr insan sağlamlığı üçün nə dərəcədə təhlükəlidir?
Mövzu ilə bağlı KONKRET.az-a danışan qida məsələləri üzrə ekspert İlkin Şirinov bildirib ki, ümumilikdə dondurmanın özü təhlükəli hesab olunmur, lakin onun tərkibində istifadə edilən əlavələr müəyyən risklər yarada bilər:
“3D dondurmaların hazırlanmasında qida boyaları, stabilizatorlar və digər qatqılardan istifadə olunur. Əgər bu maddələr normativlərə uyğun şəkildə tətbiq edilərsə, ciddi təhlükə yaratmır. Lakin normadan artıq istifadə edildikdə və ya keyfiyyətsiz xammal seçildikdə bu, insan sağlamlığı üçün riskə çevrilir. Dondurmanın hazırlanmasında istifadə olunan süd məhsullarına əlavə yağlılıq vermək üçün trans yağlardan istifadə edilərsə, bu, artıq ciddi riskdir. Eyni zamanda, parlaq rəng əldə etmək üçün əlavə olunan boyaların keyfiyyəti və miqdarı da böyük əhəmiyyət daşıyır. İnsanlar bu cür məhsulları mütəmadi şəkildə istehlak etdikdə sağlamlıqlarını təhlükə altına ata bilərlər.”
İlkin Şirinov əlavə edib ki, məsələnin ən vacib tərəflərindən biri də gigiyenik şəraitdir.
Onun sözlərinə görə, məhsulların hansı şəraitdə hazırlandığı, istifadə olunan qatqıların laboratoriyada yoxlanılıb-yoxlanılmadığı əsas göstəricilərdən biridir:
“Əsas məsələ bu məhsulların hansı şəraitdə istehsal olunmasıdır. Əgər istehsal prosesi gigiyenik qaydalara uyğun deyilsə, yaxud istifadə olunan qatqılar laborator analizdən keçmirsə, bu, istehlakçılar üçün ciddi təhlükə yaradır.”
Ekspertin fikrincə, istehlakçılar xüsusilə uşaqlar arasında populyar olan bu cür rəngli dondurmalara qarşı diqqətli olmalı, məhsulun tərkibi və istehsal şəraiti barədə məlumatlı seçim etməlidirlər.
