“Ev südü və süd məhsullarının bazarlarda, insanların sıx toplaşdığı yerlərdə, bəzən isə məhəllə marketlərində plastik qablarda satıldığını tez-tez müşahidə edirik. Hətta ailə üzvlərimizdən bəzilərinin də bu cür məhsullardan istifadə etdiyini görürük. Ancaq bu, qida təhlükəsizliyi və qanunvericilik baxımından düzgün deyil. Çünki plastik qablarda süd satılmadan əvvəl bu qabların əvvəlki istifadəsi ilə bağlı müəyyən suallar ortaya çıxır. Bu qablar əvvəlcə hansı məhsul üçün istifadə olunub? Məsələn, qazlı içkilər, şirələr və ya başqa maddələr olmuş ola bilər. Biz bu barədə məlumatlı deyilik”.
Gündəm24.az Redaktor.az-a istinadən xəbər verir ki, qida eksperti İlkin Şirinov süd və süd məhsullarının plastik qablarda satılmasından danışarkən bildirdi.
Qabların tam sterilizə edilməsi və təmizlənməsi məsələsinə gəlincə, müsahibimiz dedi ki, bu, praktiki olaraq mümkün deyil:
“Çünki plastik qablarda dar boğaz olduğu üçün onların içini tam şəkildə təmizləmək çox çətindir. Adətən, bu cür qablar yalnız ilıq su ilə yuyula bilir və bu da onların tam təmizlənməsi üçün yetərli deyil. Süd isə risk qrupuna daxil olan məhsul olduğuna görə, hər hansı bir qalıq maddə bu cür qabdan südün tərkibinə keçə bilər. Bu da, uzun müddət istifadə edildikdə, insan sağlamlığına zərər verə bilər, xüsusən allergik reaksiyalar, mədə-bağırsaq problemləri və digər sağlamlıq fəsadlarına səbəb ola bilər. Bir digər təhlükə də plastik qablarda südlərin günün altında saxlanılması məsələsidir. Qeyd etmək lazımdır ki, birdəfəlik istifadə olunan plastik butulkalar, məsələn, pet butulkalar, yalnız bir dəfə istifadə üçün nəzərdə tutulub. Bu cür qablar günəş şüalarının altında saxlanıldıqda, kimyəvi maddələrin və bakteriyaların inkişafına səbəb ola bilər. Plastik butulkaların içərisindəki kimyəvi maddələr südün tərkibinə keçə bilər. Bu, xüsusən E.coli və Salmonella kimi təhlükəli bakteriyaların inkişafına şərait yarada bilər”.
İlkin Şirinov qeyd etdi ki, qanunvericiliyə görə, süd yalnız şəffaf şüşə butulkalarda satılmalıdır, çünki şüşə qablar plastikdən fərqli olaraq, maddələrin keçməsinə və bakteriyaların çoxalmasına imkan vermir.
“Bir çox süd istehsalçıları bu qaydalara əməl edərək məhsullarını şüşə qablarla satmağa üstünlük verirlər. Bu vəziyyətdən belə bir nəticəyə gəlmək olar ki, birdəfəlik istifadə olunan plastik qablarda südlərin satışına yol verilməməlidir. Süd, təbii və həssas bir məhsul olduğuna görə, onun tərkibinin dəyişməsi və ya mikrobial çirklənməsi insan sağlamlığına ciddi təhlükə yarada bilər. Bu, xüsusən allergik insanlar, hamilə qadınlar və uşaqlar üçün daha böyük risklər daşıyır. Buna görə də, südün düzgün şəkildə saxlanılması və satılması üçün yalnız xüsusi, sağlamlıq üçün təhlükəsiz qabların istifadəsi zəruridir”, – deyə o yekunlaşdırdı.
