Ölkədə rəqəmsallaşma və hüquqi islahatlar istiqamətində yeni mərhələ başlayıb. Rəqəmsal İnkişaf və Nəqliyyat Nazirliyi ilə Ədliyyə Nazirliyinin birgə layihəsi olan süni intellekt dəstəkli innovativ hüquqi axtarış platforması – e-qanun-ai ictimaiyyətə təqdim edilib. Təqdimatda dövlət və hökumət nümayəndələri, Milli Məclisin üzvləri və hüquq ictimaiyyəti iştirak edib.
Gündəm24.az xəbər verir ki, bu sözləri Milli Məclisin İnsan hüquqları komitəsinin sədri, millət vəkili, Sosial tədqiqatlar Mərkəzi İdarə heyətinin sədri Zahid Oruc deyib. Onun sözlərinə görə, Vətən müharibəsində əldə olunan tarixi qələbə təkcə torpaqlarımızın azad olunması ilə yekunlaşmadı, həm də Azərbaycanın hüquqi sistemini işğal dövründəki məhdudiyyətlərdən xilas etdi. Oruc bildirib ki, 44 günlük müharibə xalqımızın yazdığı “ədalət qanunu” oldu və bu gün qəbul edilən qanunlar artıq məğlubiyyətin deyil, zəfərin hüquqi aktlarına çevrilir.
Deputat vurğulayıb ki, süni intellekt əsaslı e-qanun-ai platforması qanunvericiliyin inkişafına, hüquqi araşdırmaların daha sürətli və dəqiq aparılmasına, hüquqi qərarların şəffaflığına mühüm töhfədir. Onun sözlərinə görə, bu sistem yalnız hüquqşünasların deyil, bütün vətəndaşların qanunların mürəkkəb dilini daha yaxşı anlamasına şərait yaradır.
“İlham Əliyevin rəhbərliyi ilə Zəfər qanunları xalqımızı Qurtuluşdan quruculuq ideyasına, müdafiədən inkişaf fəlsəfəsinə aparır. İndi haqqımızı yalnız savaşla deyil, ədalət və Konstitusiya ilə yaşatmaq zamanıdır. Gəlin, qanunlarımızla ucalaq!”, – deyə Oruc məqaləsində qeyd edib.
Gündəm24.az
