Bu gün Azərbaycan teatrının tanınmış simalarından, uzun illər Sumqayıt Dövlət Dram Teatrında fəaliyyət göstərmiş rejissor və aktyor Yusif Əkbərovun doğum günüdür.
Gündəm24.az xəbər verir ki, Yusif Məmmədağa oğlu Əkbərov 2 sentyabr 1949-cu ildə anadan olub.
O, 1972-ci ildə M.A.Əliyev adına Azərbaycan Dövlət İncəsənət İnstitutunun rejissorluq fakültəsini bitirib. Həmin il C.Cabbarlı adına Gəncə Dövlət Dram Teatrında quruluşçu rejissor kimi fəaliyyətə başlayıb.
Yusif Əkbərovun yaradıcılıq həyatının mühüm bir hissəsi isə Sumqayıt teatrı ilə bağlı olub. O, 1974-cü ildə H.Ərəblinski adına Sumqayıt Dövlət Dram Teatrına quruluşçu rejissor təyin edilib, 1987-1991-ci illərdə isə teatrın baş rejissoru vəzifəsində çalışıb.
Rejissor Sumqayıt Dövlət Dram Teatrında “Əsrə bərabər gün”, “Bəxt üzüyü”, “Qınamayın məni”, “Qaravəlli”, “Bağdada putyovka var” kimi tamaşalara quruluş verib.
1991-ci ildən Azərbaycan Dövlət Musiqili Komediya Teatrında quruluşçu rejissor kimi fəaliyyətini davam etdirən Yusif Əkbərov burada da bir sıra tamaşalara quruluş verib.
Teatr sənətinə töhfələrinə görə 2012-ci ildə Prezident Mükafatına layiq görülüb.
Yusif Əkbərov 4 oktyabr 2016-cı ildə vəfat edib.
