İş günlərində yuxusuz qalan bir çox insan həftəsonu daha uzun yataraq bunu kompensasiya etməyə çalışır. Ancaq mütəxəssislər xəbərdarlıq edirlər ki, həddindən artıq uzun yuxu hər zaman faydalı olmaya bilər.
Sfera.az xəbər verir ki, yuxu mütəxəssislərinin sözlərinə görə, sağlam böyüklər üçün gündə 7-9 saat yuxu ideal hesab olunur. Həftəsonu bir-iki saat artıq yatmaq normal olsa da mütəmadi olaraq 10-12 saat yatmaq bioloji saatın pozulmasına, bazar ertəsi yorğunluğuna və diqqətin azalmasına səbəb ola bilər.
Psixoloqlar bildirirlər ki, uzun yuxu bəzən fiziki yorğunluqdan deyil, stress, emosional tükənmişlik və ya depressiya kimi psixoloji problemlərdən qaynaqlana bilər.
Kardioloqlar isə qeyd edirlər ki, həm az, həm də həddindən artıq yuxu bəzi ürək-damar və maddələr mübadiləsi problemləri ilə əlaqələndirilir.
Ekspertlər hesab edirlər ki, sağlam yuxu üçün ən vacib amil həftənin bütün günlərində mümkün qədər eyni saatlarda yatıb oyanmaqdır. Əgər insan uzun müddət yatmasına baxmayaraq özünü daim yorğun hiss edirsə bunun səbəbini araşdırmaq üçün həkimə müraciət etməsi tövsiyə olunur.
