Kartof qızartması süfrələrin əvəzolunmaz ləzzəti olsa da, çox vaxt ağır və zərərli yemək hesab olunur. Əslində bir neçə kiçik detala diqqət yetirməklə bu təamı həm xırtıldayan, həm də orqanizm üçün daha yüngül formaya salmaq mümkündür.
Gündəm24.az xəbər verir ki, mütəxəssislər kartofun tərkibindəki nişastanı azaltmağın vacib olduğunu bildirirlər. Qızartma prosesinə başlamazdan əvvəl doğranmış kartofları ən azı 30 dəqiqə soyuq suda saxlamaq lazımdır. Bu üsul kartofun artıq nişastadan təmizlənməsinə kömək edir və onun tavada bir-birinə yapışmasının qarşısını alır.
Suda saxladığınız kartofları mütləq kağız dəsmal və ya təmiz mətbəx dəsmalı ilə tam qurutmalısınız. Nəmli qalan kartof yağda qaynamağa başlayır və xırtıldayan olmaq əvəzinə yumşalır. Sağlamlıq baxımından isə günəbaxan yağı əvəzinə yüksək temperatura davamlı olan zeytun yağı və ya kərə yağından istifadə etmək daha məsləhətlidir.
Digər önəmli məqam isə kartofu soyuq yağa tökməməkdir. Yağ kifayət qədər qızdıqdan sonra kartofları əlavə etmək lazımdır ki, tərəvəz dərhal özünü tutsun və daxilinə həddindən artıq yağ çəkməsin. Qızartma zamanı tavanın qapağını örtməmək də əsas şərtlərdən biridir, çünki buxar kartofun strukturunu pozur.
Əgər yağdan tamamilə qaçmaq istəyirsinizsə, soba və ya hava fritürləri (airfryer) ən yaxşı seçimdir. Kartofları bir az yağ və sevdiyiniz ədviyyatlarla qarışdırıb yüksək temperaturda bişirməklə eyni dadı daha az kalori ilə əldə edə bilərsiniz.
Qısası, kartofun nişastasını yuyub yaxşıca qurutduqdan sonra düzgün temperaturda bişirsəniz, o, həm dadlı, həm də daha az zərərli olacaq./demokrat
