1991-ci ilin bu günündə – oktyabrın 18-də Azərbaycan Respublikasının Ali Soveti tərəfindən “Azərbaycan Respublikasının Dövlət Müstəqilliyi haqqında Konstitusiya Aktı” qəbul edilib. Bununla da Azərbaycan xalqı 70 illik sovet imperiyası əsarətindən azad olaraq, dövlət müstəqilliyini bərpa edib.
Gündəm24.az xəbər verir ki, Konstitusiya Aktında qeyd olunurdu ki, Azərbaycan 1918-ci ildə yaradılmış Azərbaycan Xalq Cümhuriyyətinin varisidir və onun dövlət atributları, bayraq, gerb və himn bərpa olunur. 1991-ci ilin dekabrında SSRİ-nin tam süqutu ilə Azərbaycan beynəlxalq aləmdə müstəqil dövlət kimi tanındı. Qısa zamanda ölkə BMT, ATƏT, İslam Əməkdaşlıq Təşkilatı və digər beynəlxalq qurumlara üzv qəbul edildi. Müstəqilliyin bərpası Azərbaycan xalqının tarixində dönüş nöqtəsi oldu. Bu illər ərzində dövlətimiz siyasi, iqtisadi və hərbi sahələrdə mühüm nailiyyətlər əldə edib, beynəlxalq arenada söz sahibinə çevrilib. Prezident İlham Əliyevin rəhbərliyi ilə Azərbaycan müstəqilliyini qoruyub saxlamaqla yanaşı, onun güclənməsi istiqamətində mühüm addımlar atıb.
2020-ci ildə 44 günlük Vətən müharibəsində torpaqlarımızın azad edilməsi də müstəqil dövlətimizin qüdrətinin göstəricisi kimi tarixə düşüb. Artıq 33 ildir ki, Azərbaycan xalqı bu günü qürur və fərəh hissi ilə qeyd edir. Müstəqillik yolu çətin, lakin şərəfli bir yol olub və bu yolda şəhid olan bütün Vətən övladlarının xatirəsi böyük ehtiramla anılır. Müstəqilliyimiz əbədidir, sarsılmazdır və dönməzdir.
