Ukrayna Prezidenti Vladimir Zelenski Ukrayna Silahlı Qüvvələrinin bu ilin yanvar-avqust aylarında Aleksandrovsk istiqamətində uğurlu hücum əməliyyatı keçirdiyini bildirib.
Gündəm24.az xəbər verir ki, Zelenskinin sözlərinə görə, əməliyyat nəticəsində Ukrayna ordusu 745 kvadratkilometr ərazini nəzarətə götürüb və Dnepropetrovsk, Donetsk və Zaporojye vilayətlərində yerləşən 26 kəndi geri qaytarıb.
Ukrayna lideri əməliyyat zamanı Rusiya qüvvələrinin azı 9 550 hərbçisinin öldürüldüyünü, 6 600-dən çox hərbçinin isə yaralandığını iddia edib. O, həmçinin əməliyyat nəticəsində Ukraynanın əsir mübadiləsi fondunun genişləndirildiyini bildirib.
Zelenski qeyd edib ki, hücum əməliyyatı əvvəlcədən hazırlanmış plana uyğun şəkildə həyata keçirilib. O, Ukrayna Silahlı Qüvvələrinin komandanlığının əməliyyatın nəticələri və bundan sonrakı addımlar barədə məruzə etdiyini bildirib.
Qeyd edək ki, açıqlanan ərazi və itkilərlə bağlı rəqəmlər Ukrayna tərəfinin məlumatlarıdır.
