Xalq artisti Aygün Kazımova “Nargis” dərgisinə müsahibəsində səhnə həyatı və şəxsi dəyişikliklərindən danışıb.
Sfera.az xəbər verir ki, Kazımova 40 ildən çoxdur sənət sahəsində olduğunu və hər yeni mərhələnin ona özünü yenidən yaratmaq imkanı verdiyini bildirib.
Müğənni səhnədəki dəyişiklikləri bir növ yenidən doğulma kimi qəbul etdiyini vurğulayıb:
“Sadəcə özümü dəyişdirirəm. Hər yeni mərhələ mənim üçün yenidən doğulmaqdır. Yıxılmaq, yüksəlmək və dəyişmək mənim üçün həyatda vacibdir”.
Səhnə performansına və görünüşünə diqqət yetirən Kazımova gözəllik sirri olaraq özünü sevməyin və özünə hörmət etməyin önəmli olduğunu qeyd edib:
“Qidalanma, su içmək və kifayət qədər yatmaq əsasdır. Ruhunuzda sülh olanda, bu gözlərinizdə də görünür”.
Aygün Kazımova qorxuya yer vermədiyini, riskləri seçərək irəlilədiyini bildirib:
“Qorxu şübhə yaradır, mən həmişə riski seçirəm”.
Kazımova səsinin onun ruhunun bir hissəsi olduğunu vurğulayıb və hər mahnısının arxasında yaşanmış təcrübələrin olduğunu bildirib:
“Əgər səsim insanlara təsir edirsə, deməli o ruhla doludur”.
Müğənni həyatını açıq yaşadığını və izləyiciləri ilə hər anını paylaşdığını da əlavə edib. O, çətin anlarını isə tamaşaçılara göstərməməyi üstün tutduğunu qeyd edib.
