Ermənistanın Baş naziri Nikol Paşinyan “Ermənistan və Azərbaycan arasında sülh müqaviləsinin imzalanması və təsdiqlənməsindən sonra dünya necə görünməlidir” sualı ilə çıxış edərək, özü də ona cavab verib.
“Bakupost” xəbər verir ki, bu zaman o bir sıra məqamlara toxunub.
Bildirib ki, Ermənistanın ərazisi 29.743 kvadrat kilometr olmalıdır. Almatı Bəyannaməsinə əsaslanan sərhəd delimitasiyası və demarkasiyası məhz bu çərçivədə davam etməlidir.
Onun sözlərinə görə, TRIPP layihəsi çərçivəsində bütün yollar və kommunikasiya marşrutları açıq olmalıdır, lakin təkcə TRIPP layihəsi çərçivəsində deyil:
“Bütün kommunikasiya xətləri işlək və açıq olmalıdır. Nəqliyyat əlaqələri və tranzit təmin edilməlidir”.
Paşinyanın iddiasına görə, anklav və eksklav məsələsi aşağıdakı düstura uyğun həll edilməlidir: sərhədin bu və ya digər tərəfində heç bir anklav və ya eksklav olmamalıdır.
Digər tərəfdən, o bildirib ki, Ermənistan və Azərbaycan bir-birinə heç bir tələb irəli sürməməli və bütün məsələlərdə bir-birini tək qoymalıdırlar. “Heç bir tələb yoxdur, o cümlədən “Qarabağ, Qaradman, Şirvan, Naxçıvan” və ya “Qərbi Azərbaycan” məntiqi”.
Sabiq xarici işlər naziri Tofiq Zülfüqarov “Bakupost”a bildirib ki, bunlar müxtəlif variantlarda, bəyanat, yaxud siyasi aktivizm formasında, ardıcıl şəkildə baş verir:
“Müxtəlif vasitələrlə Ermənistan öz mövqeyini təbliğ edir. Paşinyan da məhz bununla məşğuldur. Ona görə də onun bu dedikləri sadəcə olaraq, Ermənistanın bu və ya digər şəkildə prosesləri necə görməsini əks etdirir”.
Sabiq nazir deyir ki, əsas məsələlərin həlli gələcəkdə gündəmə gələcək:
“Real vəziyyətə gəldikdə, Azərbaycan tərəfindən danışıqlar və təmaslarla məşğul olan məsul şəxslər, o cümlədən dövlət başçısının bu mövzuya aid açıqlamaları bəllidir. Bu baxımdan həmıya bəllidir ki, demarkasiya və delimitasiya prosesi hələ yekunlaşmayıb və davam etdiriləcək. Əsas məsələlərin həlli hələ gələcəkdə gündəmə olacaq”.
T. Zülfüqarov qeyd edir ki, qəbul edilmiş sənədlərdə Ermənistanın öhdəlikləri var:
“Naxçıvanın blokadasının aradan götürülməsi üçün konkret vəzifələr mövcuddur. Azərbaycan da bu məsələnin həllinə üstünlük verir. Belədə Bakı Ermənistandan bəyanatlar deyil, konkret addımlar gözləməkdədir”.
