Xəbər verdiyimiz kimi, İran İslam Respublikasının Kəşfiyyat Nazirliyinin bəzi xarici media subyektlərini, o cümlədən Azərbaycanın dövlət televiziya kanalı AzTV-ni “düşmən media qurumları” siyahısına daxil edib.
Mövzu ilə bağlı Redaktor.az-a açıqlamasında İranın Azərbaycandakı keçmiş səfiri, politoloq Əfşar Süleymani bildirdi ki, bu, yeni məsələ deyil:
“İllərdir həm Azərbaycanda, həm də İranda bəzi xəbər agentlikləri və televiziya kanalları bir-birinin əleyhinə materiallar yayımlayırlar. Bu, uzun müddətdir davam edən prosesdir. Bəzi dövrlərdə bu hallar azalıb və o qədər də diqqət çəkməyib. Bəzi vaxtlarda isə əksinə, daha da artıb, geniş yayılıb və hər iki cəmiyyətdə mənfi təəssürat yaradıb. Bu reallıqdır. Mən bu xəbəri dünən oxudum və bir sıra məqamlar yadıma düşdü. Burada əsas məsələ ondan ibarətdir ki, bu, birtərəfli proses deyil. Həm İranda, həm də Azərbaycanda bir-birinin əleyhinə informasiyalar yayılıb, tənqidlər səsləndirilib və bu proses müxtəlif media qurumları vasitəsilə davam edib. İranın Kəşfiyyat Nazirliyi də yəqin ki, öz qiymətləndirməsinə əsaslanaraq belə bir qərar qəbul edib və Azərbaycan Televiziyasını həmin siyahıya daxil edib. Onlar AzTV-də İranla bağlı yayımlanan materialları əsas gətiriblər. Azərbaycan tərəfi də qarşılıqlılıq prinsipindən çıxış edərək İranın “Səhər” telekanalı və “Mehr” agentliyi ilə bağlı müvafiq qərarlar qəbul edib. Yəni hər iki tərəfin bu addımları atmasına səbəb olan amillər olub”.
Müsahibimiz əlavə etdi ki, bu prosesi İran tərəfi başladıb:
“Amma ümumilikdə məsələni illərdir izləyən biri kimi deyə bilərəm ki, bu cür addımlar səbəbsiz yaranmayıb. Mən bu prosesi uzun illər müşahidə etmişəm. Azərbaycanda İranın səfiri işlədiyim dövrdə çalışırdım ki, belə hallar minimuma ensin. Hətta o vaxt “Səhər” telekanalının fəaliyyətində də çalışdım ki, əsas istiqamət Azərbaycan əleyhinə materiallar deyil, dostluğun, əməkdaşlığın möhkəmləndirilməsi və xalqların bir-birinə yaxınlaşdırılması olsun. Eyni zamanda Azərbaycanda da müxtəlif media rəhbərləri, o cümlədən AzTV-nin rəhbərliyi və digər televiziya kanalları ilə görüşlərimiz olurdu. Məqsədimiz münasibətlərin dostluq ruhunda inkişaf etməsinə töhfə vermək idi. Əgər iki tərəf arasında narazılıq doğuran məsələlər vardısa, hesab edirdim ki, bunlar mediada deyil, qapalı və rəsmi danışıqlarda müzakirə olunmalı, həll yolu tapılmalı idi”.
Əfşar Süleymani qeyd etdi ki, hətta o dövrdə İran və Azərbaycanın təhlükəsizlik qurumları arasında rəsmi əlaqə mexanizmləri mövcud idi:
“İranın Təhlükəsizlik Nazirliyinin nümayəndəsi Azərbaycanda fəaliyyət göstərirdi, Azərbaycanın da İranda müvafiq nümayəndəsi var idi. Onlar mütəmadi əlaqə saxlayır, problemləri müzakirə edir və onların ictimailəşmədən həll olunmasına çalışırdılar. Bu əməkdaşlıq kifayət qədər uğurlu idi. Eyni zamanda, İran və Azərbaycan arasında hərbi attaşelər də fəaliyyət göstərirdi. Müdafiə və təhlükəsizlik sahəsində qarşılıqlı səfərlər təşkil olunur, yüksək səviyyədə əməkdaşlıq həyata keçirilirdi. Həmin dövrdə münasibətlərin möhkəmlənməsi üçün kifayət qədər ciddi işlər görülmüşdü. Lakin sonradan vəziyyət dəyişdi. Xüsusilə Qarabağ məsələsi və 44 günlük Vətən müharibəsindən sonrakı dövrdə münasibətlərdə yenidən problemlər yarandı. Görünür ki, bu gün də İran və Azərbaycan arasında qarşılıqlı etimad hələ arzuolunan səviyyədə deyil və baş verənlər də bunu göstərir. Əslində, bu qərarlar qəbul edilməzdən əvvəl tərəflər bir-biri ilə danışa bilərdilər. Məsələlər müzakirə olunsaydı, bəlkə də nə Azərbaycan Televiziyası ilə bağlı belə qərar qəbul edilərdi, nə də Azərbaycan tərəfi “Səhər” telekanalı və “Mehr” agentliyi ilə bağlı qarşılıqlı addım atardı”.
Keçmiş səfir bildirdi ki, bu dövrdə bu proseslərin içində olsaydı, müəyyən diplomatik yollarla belə vəziyyətin qarşısını alardı:
“Özümü tərifləmək istəmirəm, sadəcə uzun illər bu məsələlərlə məşğul olmuşam, onların incəliklərini bilirəm və düşünürəm ki, müəyyən həll yolları tapmaq olardı. Ona görə də hesab edirəm ki, hər iki tərəfin qəbul etdiyi bu qərarlar problemin həlli deyil. Əksinə, biz yenə də nələrinsə şahidi olacağıq. Bu məsələni kökündən həll etmək üçün ilk növbədə qarşılıqlı etimad bərpa olunmalı, davamlı dialoq aparılmalı və problemlər masa arxasında həll edilməlidir. Təəssüf ki, hazırda bu mexanizmlər kifayət qədər işləmir.
Ümid edirəm ki, gələcəkdə qarşılıqlı anlaşma yaranacaq, tərəflər bir-biri ilə daha çox dialoq quracaq, mövcud problemləri müzakirə yolu ilə həll edəcək və münasibətlər daha da möhkəmlənəcək. Çünki biz qonşuyuq, buradan heç kəs köçən deyil ki. Münasibətləri sağlam əsaslar üzərində qurmaq vacibdir ki, başqaları da bu vəziyyətdən sui-istifadə edə bilməsinlər”.
