Xalq artisti Mehriban Zəki dələduzluqla üzləşib. O, instaqram hesabında video paylaşaraq “Kapital Bank” əməkdaşı adı ilə vatsapdan ona zəng vurulduğunu, şəxsi məlumatlarını istədiyini bildirib.
Gündəm24.az xəbər verir ki, “Kapital Bank” məsələ ilə bağlı açıqlama yayıb.
Açıqlamada qeyd olunub ki, son zamanlar insanları müxtəlif yollarla aldadaraq onlara məxsus vəsaitləri mənimsəməyə çalışan dələduzların hədəfi bu dəfə Xalq artisti Mehriban Zəki olub: “O bu barədə öz sosial şəbəkə hesabında məlumat verib. Məlum olub ki, özünü “Kapital Bank” əməkdaşı kimi təqdim edən dələduz ona “WhatsApp” sosial şəbəkəsi üzərindən zəng edib və şəxsi məlumatlarını istəyib. Dələduzluq halları ilə bağlı məlumatlı olan Mehriban xanım heç bir məlumat təqdim etməyib və dərhal bankla əlaqə saxlayıb. Bankdan ona həmin nömrənin həqiqətən də banka aid olmadığı bildirilib və zəng edən şəxsin dələduz olduğu təsdiq edilib”.
“Kapital Bank”dan bildirilib ki, aidiyyəti qurumların və bankların təhlükəsizlik tədbirləri ilə yanaşı, hər kəsin kiberdələduzluğa qarşı diqqətli olması olduqca vacibdir: “Kartın üzərindəki 16 rəqəmli PAN nömrə, kartın arxasında olan 3 rəqəmli CVV kod və mobil nömrəyə göndərilən 4 rəqəmli OTP şifrə yalnız kart sahibinə məxsusdur və bu məlumatları heç kimlə bölüşmək olmaz. Unutmayaq ki, heç bir bank əməkdaşı müştəriyə sosial şəbəkə hesablarından və ya xarici nömrədən zəng edə bilməz. “Kapital Bank” adından zəng edən şəxslərin isə bank əməkdaşı olub-olmadığını yoxlamaq olduqca asandır. Bunun üçün müştərilər zəng edən şəxsdən mobil tətbiqə bank əməkdaşı olduğunu təsdiq edən bildiriş göndərməsini tələb edə bilər. O həqiqətən bank əməkdaşıdırsa, vətəndaş “Birbank” mobil tətbiqində bunu təsdiq edən bildiriş alır. Bildirişdə qeyd edilir:
“Dəyərli “Birbank”lı, bank məhsulunu təklif edən şəxsin bankımızın əməkdaşı olduğunu təsdiq edirik. Bizə güvəndiyiniz üçün təşəkkür edirik”.
Mobil tətbiqdə bildiriş alındığı təqdirdə zəng edən şəxslə danışığı davam etdirmək olar, əks halda zəngi dərhal sonlandırmaq lazımdır”.
