Məlumata görə, Rusiyada üç təxribatçı Kiyev rejiminin əmri ilə rus əsgərlərini, humanitar yardım könüllülərini və strateji infrastruktur obyektlərini hədəf almağı planlaşdırarkən cinayət başında yaxalanıb.
Gündəm24.az xəbər verir ki, TASS agentliyinin Rusiya Federal Təhlükəsizlik Xidmətinə (FSB) istinadən yaydığı məlumata görə,Rusiya Federal Təhlükəsizlik Xidməti (FSB) Ukrayna xüsusi xidmət orqanları ilə əlaqəli olduğu iddia edilən daha bir terror şəbəkəsinin zərərsizləşdirildiyini açıqlayıb. Adıgey Respublikası, Tümen vilayəti və Krasnodar diyarında eyni vaxtda keçirilən əməliyyatlar zamanı üç nəfər saxlanılıb.
FSB-nin məlumatına görə, saxlanılan şəxslər Rusiya Silahlı Qüvvələrinin hərbçilərini, Xüsusi Hərbi Əməliyyat iştirakçılarına dəstək göstərən könüllü təşkilatları, eləcə də nəqliyyat, yanacaq və enerji infrastrukturunu hədəf alan terror və təxribat aktları planlaşdırıblar. Təhlükəsizlik qüvvələrinin vaxtında müdaxiləsi nəticəsində mümkün hücumların qarşısının alındığı bildirilib.
İstintaq zamanı şübhəlilərin elektron cihazlarında Ukraynadakı kuratorlarla yazışmalar və terror aktlarının həyata keçirilməsi ilə bağlı konkret təlimatların aşkar edildiyi iddia olunur. Axtarışlar zamanı xaricdə istehsal edilmiş plastik partlayıcı maddələrdən hazırlanmış əldəqayırma partlayıcı qurğular və bir neçə yandırıcı vasitənin də müsadirə edildiyi qeyd olunub.
Saxlanılan şəxslərə qarşı “terror aktına hazırlıq” və “qanunsuz partlayıcı maddələr saxlama” maddələri ilə cinayət işləri açılıb. Rusiya mənbələri onların ölkə vətəndaşı olmaları və Kiyevlə əlaqələrinin araşdırılması fonunda “dövlətə xəyanət” ittihamı ilə də məhkəmə qarşısına çıxarıla biləcəklərini bildirib. Hadisə ilə bağlı Ukrayna tərəfinin mövqeyi isə açıqlanmayıb.
Sədaqət Həsənova
