Ötən ay Oman körfəzində ABŞ tərəfindən ələ keçirilən İran bayrağı altında üzən “Tuska” yük gəmisinin heyəti İrana qaytarılmaq üçün Pakistana göndərilib. Gəminin sahibinə qaytarılması prosesinin başladığı da açıqlanıb.
Gündəm24.az xəbər verir ki, Oman körfəzi və Hörmüz boğazı ətrafında baş verənlər ABŞ və İran arasında təhlükəli qarşıdurmanın yeni mərhələyə keçdiyini göstərir. ABŞ Hərbi Dəniz Qüvvələrinin İran bayrağı altında üzən “Touska” gəmisinə müdaxiləsindən sonra heyətin taleyi ilə bağlı detallar üzə çıxıb – 22 nəfər Pakistana göndərilib, digər şəxslərin isə mərhələli şəkildə repatriasiyası həyata keçirilir. Rəsmi Vaşinqton əməliyyatı təhlükəsizlik tədbiri kimi təqdim etsə də, Tehran bunu açıq şəkildə “təxribat” adlandırır.
Pakistanın da təsdiqlədiyi bu proses çərçivəsində heyətin İrana təhvil verilməsi gözlənilir, gəminin isə texniki baxımdan bərpa edildikdən sonra sahiblərinə qaytarılması planlaşdırılır. Hadisə, ABŞ prezidenti Donald Trampın gəminin saxlanıldığını açıqlaması ilə gündəmə gəlib və bölgədəki onsuz da həssas vəziyyəti daha da gərginləşdirib.
İran tərəfi iddia edir ki, ABŞ qüvvələri gəmiyə atəş açaraq onu ələ keçirib, Vaşinqton isə gəminin dəniz blokadasını pozmağa çalışdığını bildirir. Yayılan görüntülərdə hərbi gəmilər və helikopterlər vasitəsilə keçirilən əməliyyat diqqət çəkir. Gərginlik bununla bitməyib – Tehran cavab olaraq bəzi ABŞ qüvvələrinə pilotsuz uçuş aparatları ilə hücum etdiyini açıqlayıb və mümkün eskalasiyaya görə məsuliyyətin tam şəkildə ABŞ-a aid olduğunu vurğulayıb.
Sədaqət Həsənova
