Müharibənin ilk dəqiqələri idi. Qarabağ səmasında Vətən savaşının ilk izləri görünürdü. Hərbi Hava Qüvvələrinin mayoru, hərbi pilot Abbas Qasımov və Dövlət Sərhəd Xidmətinin baş leytenantı, hərbi pilot Xalid Gözəlov Vətənin azadlığı uğrunda döyüşə atılaraq Qarabağ səmasına yüksəlmişdilər.
Füzuli səmasında iki şahin kimi qanad açan qəhrəman pilotlar Vətən uğrunda müqəddəs savaşa qoşulmuşdular. Onların uçuşu cəmi bir neçə dəqiqə sonra əbədiyyətə çevriləcək, adları Vətən müharibəsinin ilk şəhidlərinin sırasına yazılacaqdı.
Bəli, müharibənin başladığı ilk dəqiqələrdə Abbas Qasımov və Xalid Gözəlov canlarını Vətən yolunda fəda etdilər. Onlar Vətən səmasının qoynunda şəhadət zirvəsinə ucaldılar. Qanadları Qarabağ səmasında qalsa da, adları xalqın yaddaşında əbədiləşdi.
İki qəhrəman pilotun son uçuşu həm də Vətən uğrunda verilən ən böyük qurbanın, müqəddəs şəhidliyin rəmzinə çevrildi.
Qeyd edək ki, Abbas Qasımov 1986-cı il martın 17-də Zəngibasarın Masis rayonunda anadan olub. Ailəsi ilə birgə 1988-ci ilin noyabr ayında ermənilər tərəfindən doğma rayonundan deportasiya edilib. Bakıya üz tutan Qasımovlar ailəsi Binəqədi rayonunda məskunlaşıb. Binəqədi rayonundakı 157 saylı tam orta məktəbi bitirən Abbas 2003-2007-ci illərdə o zamankı Milli Təhlükəsizlik Nazirliyinin Heydər Əliyev adına Akademiyasında ali təhsil alıb. Burada o, Sərhəd Qoşunları fakültəsini seçib. Və beləcə, uşaqlıq arzusu olan pilot ixtisasına yiyələnib. Ölümündən sonra “Vətən uğrunda” medalı, 3-cü dərəcəli “Vətənə xidmətə görə” ordeni və “Qubadlının azad olunmasına görə” medalı ilə təltif edilib. Özündən sonra iki oğul övladı yadigar qalıb. Xalid Gözəlov 1996-cı ilin 4 noyabrında Biləsuvar rayonun Aşağı Cürəli kəndində anadan olub. O, 2002-ci ildə Zaqatalada 2 saylı orta məktəbin 1-ci sinfinə daxil olub. Atasının işi ilə əlaqədar olaraq daha sonra məktəbi Biləsuvarda davam etdirməli olub. 2012-ci ildə Oktay Babayev adına orta məktəbdən məzun olub. Orta məktəbi bitirdikdən sonra ali məktəbə imtahan verərək ödənişsiz əsaslarla Texniki Universitetə daxil olsa da, orada oxumayıb. Çünki hərbçi olmağı arzulayırmış. Daha sonra yenidən sənədlərini Dövlət Sərhəd Xidməti Akademiyasına verərək, istəyinə nail olub. Akademiyanı bitirən kimi xüsusi bacarığına görə o, pilot vəzifəsinə təyin olunub. Xalid uşaqlıqdan idmanın güləş növü ilə məşğul olub. Saysız-hesabsız mükafatlar, medallar qazanıb. 2019-cu ildə baş leytenant rütbəsi alıb. O, ölümündən sonra “Vətən uğrunda” , “Qubadlının azad olunmasına görə” medalları və “Vətənə xidmətə görə” ordeni ilə təltif olunub.//musavat.com
